Журналистің сұрақтарына салиқалы жауап берген Мемлекет басшысы Қасым-Жомарт Тоқаев Қазақстанның өткен жылғы әлеуметтік-экономикалық даму бағытында жүзеге асырылған жүйелі жұмыстарға терең талдау жасап, алдағы жоспарларымен бөлісті.
Президент мемлекетіміздің Басым бағыттарды белгілеп берген стратегиялық маңызы зор сұхбатта өткен жыл еліміз үшін оңай болмағанын ашық айтты. «Жұмыла көтерген жүк жеңіл» дегендей, ынтымағы жарасқан дана халқымыздың береке-бірлігі, ауызбіршілігі мен ұйымшылдығының арқасында кезіккен қиындықтарды еңсергенімізді тілге тиек етті. Бұған мысалды алыстан іздемей-ақ, өзіміздің облыстан да көптеп келтіруге болады. Бір ғана мысал, көкмемгі су тасқыны кезінде өз өңіріміздегі қауіп-қатерге ұшыраған жандарға жұмылы қол ұшын берумен қатар, сонау солтүстік өңірлердегі қандастарымызға да жәрдем жасап, көмек көрсеттік. Біздің «Қазақмыс» корпорациясының құрылысшылары сол жақта баспанасыз қалған бауырларымызға заманауи үлгідегі үйлер салып беріп, қуанышқа кенелтті. «Бірлік бар жерде тірлік бар» деп халқымыз бекер айтпаса керек.
Баршаға мәлім, барлық өңірлерде «Таза Қазақстан» жалпыұлттық экологиялық акциясы басталып, бұл игі бастама халықтың үлкен қолдауына ие болды. Ұлытау облысының тұрғындары да сол ұлы істің бел ортасында болды. «Қазақмыс» корпорациясы ардагерлер кеңесінің Сәтбаев қалалық филиалында есепте тұрған ардагерлер де осы орайдағы істерге бастамашы болып, жастарға үлгі көрсетті. Бұл іс биыл да өзінің жалғасын табатын болады. Осындай жұмыла жұмыс істеудің арқасында өңіріміз дамып, өндірісіміз өрге басып келеді.
Әбулайс Молақов, «Қазақмыс» корпорациясы ардагерлер кеңесі Сәтбаев филиалының төрағасы.
Сондай-ақ оқыңыз
