Жезқазған қаласының өндірістік алаңында «Қазақмыс» еңбек ұжымдарының корпорация басшылығымен дәстүрлі жұмыс кездесуі өтті. Кездесу «Қазақмыс» корпорациясы» ЖШС Басқарма төрағасы Нұрахмет Нұриевтің төрағалығымен ашық диалог форматында өткізілді.
Сондай-ақ, кездесуге «Қазақмыс» корпорациясы» ЖШС бас директоры Олег Копытов, «Қазақмыс» корпорациясы» ЖШС тау-кен, байыту кешенінің бас директоры Руслан Елкеев және «Қазақмыс» корпорациясы» ЖШС-нің кадр жөніндегі директоры Владимир Лян қатысты.
Кездесу барысында бірінші басшылар қызметкерлерге компанияның өткен жартыжылдық қызметінің нәтижелері туралы толық есеп берді. Жиында өнеркәсіптік қауіпсіздік, әлеуметтік жауапкершілік, компанияның даму жоспарлары, сондай-ақ, басқа да өзекті өндірістік мәселелер талқыланды.
«Қазақмыс» корпорациясы» ЖШС бас директоры Олег Копытов атап өткендей, 2023 жылдың бірінші жартыжылдығына арналған өндіріс жоспарлары сәтті орындалуда.
Сонымен қатар, Нұрқазған байыту фабрикасында жөндеу жұмыстары жүргізілуде. Биылғы жылдың тамыз айында фабриканы өндірістік көрсеткіштерге, ал 2024 жылдың қаңтарына қарай жобалық қуатқа шығару жоспарлануда. «Қажықонған» кенішінде теміржол тұйығын салу жұмыстары жалғасуда. Кенішті өндірістік көрсеткіштерге шығару осы жылдың екінші жартыжылдығында жоспарланып отыр.
Компания үшін маңызды оқиға Корпорацияның алдағы 20 жылға – 2043 жылға дейінгі Дамуының стратегиялық жоспарын әзірлеу болып отыр. Негізгі басымдық жобалық қуаты жылына 6 млн. тонна кен болатын «Жыланды» кен орнын салу болып қала береді. Сондай-ақ, «Жайсаң», «Нұрқазған», «Қажықонған» кеніштерінің құрылысы жалғасуда, Жезқазған кен байыту фабрикасын қайта жаңғырту жұмыстары жүргізілуде.
– Қазір Директорлар кеңесінің төрағасы Эдуард Викторович Огайға бес жылдық даму бағдарламасын әзірлеуді тапсырды. Баланстан тыс қорлар Жезқазған бойынша 114 келісім-шарт бойынша, 01.01.2023 жылға – шамамен 735,5 млн. тонна кен. Мұның бәрін қалай жасау керектігі туралы ойланайық. Сондай-ақ, стратегиялық даму жоспары негізінде Директорлар кеңесінің төрағасының қарауына шығарылатын ЖБФ даму тұжырымдамасы дайындалуда, – деп қорытындылады «Қазақмыс» корпорациясы» ЖШС бас директоры Олег Копытов.
«Қазақмыс» корпорациясы» ЖШС әлеуметтік бағдарламалардың іске асырылу барысы туралы персонал жөніндегі директор Владимир Лян айтып берді. 2023 жылдың 1 маусымынан бастап еш жерде теңдесі жоқ екі ауқымды бағдарлама іске қосылды.
Бірінші бағдарлама – зейнеткерлік жасқа дейін квота беру саясаты. Ол зиянды еңбек жағдайында жұмыс жасайтын жұмысшыларға арналған. Енді бұл санаттағы қызметкерлер зейнеткерлікке ресми түрде шығуға 3 жыл қалғанда ерте шыға алады. Осы кезеңде «Қазақмыс» зейнетақы жарналары көлемінде сақтандыру төлемдерін төлейтін болады. Зейнет жасына жеткенде «Қазақмыстан» бұл төлемдер тоқтайды, бірақ мемлекеттен зейнетақы төлемдері басталады.
Нұрахмет Қанатұлы атап өткендей, бұл бағдарлама сол зиянды, еңбек жағдайы немесе басқа себептермен мемлекет белгілеген мерзімнен ертерек зейнетке шыққысы келетін қызметкерлерге арналған.
– Жұмыс беруші ретінде бізде екі жол болды: не сырттан келетін жалпы бағдарламаны күту, не өз күшімізбен бірдеңе жасауға тырысу. Біз екінші жолды таңдадық. Ұжымдардың, әсіресе ауыр және зиянды еңбек жағдайында жұмыс жасайтын жұмысшылардан өтініш түсті, біз зейнет жасын төмендетуге тырысуды жөн көрдік. Қаржылық мүмкіндіктерге сүйене отырып, зейнеткерлікке шығуға 3 жыл қалғанда бұл бағдарламаны іске қосуды жөн көрдік. Ең бастысы, бағдарламаның міндетті емес екенін түсінгеніңіз жөн, кім ертерек зейнетке шыққысы келсе, біз осындай мүмкіндік беріп отырмыз, – деді «Қазақмыс» корпорациясы» ЖШС Басқарма төрағасы Нұрахмет Нұриев.
Екінші ауқымды бағдарлама – өндірістік жарақат алу немесе кәсіптік ауру салдарынан мүгедектерге, сондай-ақ өндірісте қайтыс болған жұмысшылардың отбасыларына атаулы әлеуметтік көмек көрсету саясаты. «Қазақмыс» мамандары отбасының әрбір мүшесіне 68 964 теңге мөлшерінде бір адамға қажетті ең төменгі кірісті есептеп, белгіледі. Егер бұл кіріс аз болса, онда корпорация айырмашылықты төлейді. Бұл бағдарлама сәтті іске қосылды, бүгінге дейін 300-ге жуық адам өтініш білдірген. Оның ішінде 66 адам жоғарылатылған материалдық көмек алу үшін комиссияның шешімімен таңдалды.
Басқа да әлеуметтік жобалар 2023 жылы жалғасын табады. Мәселен, Жезқазған медициналық орталығының балаларды оңалту бөлімінде мүмкіндігі шектеулі балаларды емдеуге 46 миллион теңгеден астам қаражат бөлінді. Алты айдың ішінде 106 бала арнайы курстардан өтті.
Аз қамтылған жұмысшыларға атаулы әлеуметтік көмек көрсету бағдарламасы жалғасын тапты. 400-ге жуық отбасына көмек көрсету үшін 42 миллион теңге бөлінді. Сонымен қатар, компания қызметкерлерінің, зейнеткерлердің және қызметкерлердің балаларының денсаулығын жақсартуға бағытталған бағдарламалар жүзеге асырылды. Сондай-ақ, қиын өмірлік жағдайға тап болған қызметкерлерге, зейнеткерлерге, қаза тапқандардың отбасыларына 145 миллион теңге көлемінде материалдық көмек көрсетілді.
2023 жылдың бірінші жартыжылдығында қайырымдылық шараларына көп көңіл бөлінді – мемлекеттік қаражаттың әлеуметтік жобаларын іске асыруға, мәдени-сауықтыру шараларына, спорттық іс-шараларды қаржыландыруға және азаматтарды қолдауға 13 миллиард теңгеден астам қаржы бөлінді.
Кездесу барысында әрбір қызметкер өз көкейлерінде жүрген сауалдарына жауаптар алды. Осылайша, «Қазақмыс» компаниясының басшылығы жұмыскерлермен тілдесуге әзір екендіктерін және өз саясатының ашықтығын тағы да көрсетті.
«Қазақмыс» корпорациясы» ЖШС баспасөз қызметі.
