Жол сапасы қашан да көкейкесті. «Жол активтері сапасының ұлттық орталығы» Ұлытау облыстық филиалы «Автомобиль жолдарын салу және жөндеу кезінде жұмыстардың сапасын бақылау» тақырыбында семинар өткізді. Оған, жол құрылысына қатысты мекеме, кәсіпорын мамандары және облысқа қарасты аудан-ауылдардың әкімдері қатысты.
Жиынның мақсаты – жол жөндеу жұмыстарындағы шешуші факторларды сараптау және тәжірибелік ұсыныстар енгізу. Мекеменің орталық аппаратынан келген мамандар автомобиль жолдарын пайдалану кезінде ведомстволық сараптама, диагностикалау, паспорттау және жол сапасын бақылау мәселелерін кеңінен баяндады. Кемшіліктерді дер кезінде анықтау және ақауларды уақытылы жою туралы да мәлімет берді.
Бұдан басқа аймақтағы жол инфрақұрылымын дамыту мен жөндеу жұмыстарының сапасын арттыру мәселелері де талқыланды. Жол құрылысы саласындағы жаңашылдықтар сөз болып, өзгерістерге түсініктеме берілді.
Айта кету керек,биыл Ұлытау облысында жол жөндеу жұмыстарына 11,2 млрд теңге бөлінген. Бұл қаржыға 137 шақырым жол жөнделеді.
Сондай-ақ оқыңыз
Гүлім МАРАТҚЫЗЫ.
