Осы аптаның сейсенбісінде Жезқазғанға Алматыдан алғаш рет «Тальго» жүрдек пойызы келді. Барлығы 22 вагоннан тұратын жүрдек пойызбен жаңа облыс орталығына 200-дей жолаушылар жетсе,шаршап-шалдықпай келген олардың көңіл күйлері көтеріңкі екені байқалады. Аймағымыздағы осы қуанышты оқиғаға орай облыс әкімдігі вокзал басында салтанатты шара ұйымдастырды.
Жаңа облысты дамыту жөніндегі бағдарламалар аясында биыл «Тальго» пойызының қатынасын жолға қою жоспарланған болатын. Үкімет пен облыс әкімдігінің қолдауымен осы игі істі «ҚТЖ» ұлттық компаниясы ойдағыдай жүзеге асырды.«Тальго» вагондарынан құралған Алматы-Жезқазған бағытындағы №73/74 пойызының келуіне арналған салтанатта Ұлытау облысы әкімінің бірінші орынбасары Аман Барекенов жолаушылар қатынасына оңтайлы мүмкіндік туған қуанышқа ортақтаса келіп, көпшілікті құттықтады. «Қазақстан теміржолы ұлттық компаниясы» акционерлік қоғамы басшылығына алғысын білдірді. Т.Қалмағамбетов атындағы филармония артистерінің әуезді әнімен әдіптелген салтанатты шарада бұдан соң ҚТЖ «Жолаушылар тасымалы» АҚ Экспресс филиалының бас директоры Мұхит Тұрсынбаев сөйледі. «Тальго» вагондарының жолаушыға қолайлы жабдықтармен жабдықталғанын атап айтты. Әр вагонда төрт орынды 5 купе болса, бір купе екі орынға арналған. Кондиционер жүйесі, электр розеткасы жұмыс істейді, биодәретханасы бар. Экспресс филиал басшысы сонымен қатар, осы қыркүйек айында Нұр-Сұлтан-Жезқазған бағыты бойынша да күнара қатынайтын екінші «Тальго» іске қосылатынын мәлімдеді. Жезқазғаннан тақ күндері шығып, күнара жүретін №65/66 бұл жүрдек пойыз Елордадағы Нұрлы жол вокзалына 13 сағатта жеткізеді.
Мысты шаhарға алғашқы сапарын жүзеге асырған Алматы-Жезқазған Тальгосы құрамында 344 жолаушылық орын бар. Күнара қатынайтын пойыздың алғашқы күнінің өзінде 200 орынға билет сатылып қойыпты. Турист класында 18 вагон болса, 2 вагон бизнес класты, 1 вагон Гранд және 1 вагон мүмкіндігі шектеулі жандарға арналған Гранд класты. Бір вагон-бар және бір вагон-мейрамхана бар. Алматыға дейінгі билет құны вагон деңгейіне қарай 9400 бен 15 мың теңге аралығында. Бұрынғы пойыз Алматыға дейін 27,5 сағат жүретін. Енді «Тальго» вагондарымен жолаушылар 19 сағат 28 минутта жететін болды. Пойыз жолда 9 станцияға ғана аялдайды. Жұп күндері таңертеңгі 10 сағат 23 минутта Жезқазғанға келетін «Тальго» екі сағаттан кейін оңтүстік астанаға қарай қайтадан жолға шығады.
Амандық РАХҰЛЫ.
