Бүгін Жезқазған қаласында көпфункциялы «Жігер» дене шынықтыру-сауықтыру кешені ашылды. Аталмыш нысан корпорацияның Ұлытау облысында спорттағы әлеуетін арттыруға бағытталған қарышты қадамдарының бірі.
«Қазақмыс корпорациясы» ЖШС мен Ұлытау облысы әкімдігінің меморандумы аясында Bank RBK қолдауымен жүзеге асқан жобаның жалпы құны – 8,5 млрд теңге.
Бес бес функционалды блокты қоса алғанда 7 816 шаршы метрді құрайтын спорт кешені үш қабаттан тұрады.
Кешен заманауи спорттық жабдықтармен қамтылған. Мысты шаһардағы алғашқы жүзу бассейні де осы кешенде. Оның ұзындығы 25 метрді құрайды.
Спорт кешенінде командалық спорт түрлері үшін электронды табломен, баскетбол алаңымен, құрал-жабдықпен және 320 көрерменге арналған трибунамен жабдықталған, ауданы 1200 шаршы метрлік әмбебап спортзал бар. Бұған қоса кешенде спорттық төсеніштермен, арқандармен және гимнастикалық снарядтармен қамтамасыз етілген, ауданы 350 шаршы метрді құрайтын көркем және спорттық гимнастика залы жұмыс істейді.
Кешеннің екінші қабатында үстел теннисі мен бокс залы орналасқан. Кәсіби ринг пен жаттығу жасауға мүмкіндік бар.
Кешеннің ашылуына Ұлытау облысы мен «Қазақмыс» корпорациясы» ЖШС басшылығы, Олимпиада чемпиондары Ермахан Ыбырайымов пен Дмитрий Баландин арнайы қатысты.
Салтанатты лента кесу рәсімінен соң қадірлі қонақтар кешеннің ашылуына арналған шоу бағдарламаға куә болды.
«Ұлытау облысының басшылығы мен «Қазақмыс» корпорациясына осы спорт кешенін ашқаны үшін алғыс білдіремін. Бүгінгі таңда мен Ұлттық құраманың жаттықтырушысы болып жұмыс істеймін. Біздің командада еліміздің барлық облыстарынан келген талантты балалар бар. Өкінішке қарай, әзірше, олардың арасында Ұлытау облысының өкілдері жоқ. Болашақта сіздердің шәкірттеріңіз Ұлттық құрамаға қабылданып, Қазақстанның намысын халықаралық аренада қорғайды деп үміттенемін. Мен әр баланың талантты екеніне сенемін. Нағыз таланттарды тауып, танып, оларға жағдай жасау маңызды мәселе»,- деді Олимпиада чемпионы Дмитрий Баландин.
Ұлытау облысының әкімі Дастан Рысбеков жаңа спорт кешені бұқаралық спорт түрлерін дамытуға және жасөспірімдер мен балаларды спортпен шұғылдануға ынталандыруға мүмкіндік беретінін атап өтті.
«Қазақмыс» корпорациясы» ЖШС басқарма төрағасы Нұрахмет Нүриев 2025 жыл басталғаннан бері компания Ұлытау облысы бойынша үшінші нысанды қолданысқа беріп жатқанын тілге тиек етті.
«Қаңтар айының басында Сәтбаев қаласында күрделі жөндеуден кейін «Ақбота» балабақшасы, одан кейін Жезқазғанда еліміздегі ең ірі шахмат академиясы ашылды. Бүгін «Жігер» дене шынықтыру-сауықтыру кешені қолданысқа беріліп жатыр. Бізді алда игі істер күтіп тұр. Жыл соңына дейін тағы 5-6 нысанды аяқтаймыз.
Баршаңызға жарқын жеңіс тілеймін. Өңіріміз дамып, өркендей берсін, жергілікті тұрғындар толағай жеңіске жетіп, өңіріміздің абыройын асқақтата берсін», – деді Нұрахмет Нүриев.
