Елімізде 21 мамыр күні Мәдениет саласы қызметкерлері өздерінің кәсіби мерекелерін атап өтеді.
Осыған орай Астанада Қазақстан республикасының Президенті Қасым-Жомарт Тоқаев мәдениет пен өнер майталмандарын қабылдап, құрмет көрсетті.
Мемлекет басшысының қатысуымен өткен алқалы жиында дәстүрлі әндерді орындаушы, Қазақстанның Халық әртісі, жерлесіміз Қайрат Байбосыновқа «Қазақстанның Еңбек Ері» мәртебелі атағын табыс етті.
«Бүгін ұлттық өнердің майталманы Қайрат Байбосыновқа «Қазақстанның Еңбек Ері» атағы беріледі. Халқымыздың жан-дүниесін айшықтай көрсететін халық өнері әрдайым төрде болуы керек. Бұл марапат – әйгілі әншінің өлшеусіз еңбегі мен ұлттық өнерімізге деген ерекше құрметтің белгісі», – деді Қасым-Жомарт Тоқаев.
Айта кетейік, Қайрат Әукенұлы 1950 жылы 1 маусымда бұрынғы Жезқазған облысындағы Жаңаарқа ауданының Атасу кентінде дүниеге келген. 1969 жылы Жүсіпбек Елібеков атындағы Республикалық эстрда-цирк колледжі (бұрынғы Алматы эстрада-цирк студиясын) бітірген.
Ұмыт болған, сирек орындалатын әндерді қалпына келтіріп, халық арасына таратуда елеулі еңбек етті. Концерттік сапармен АҚШ, Жапония, Германия, Франция, Испания, Италия, Түркия, Қытай, Бирма, Сингапур сынды елдерде болып, ұлттық өнерімізді шет ел тыңдаушылырына танытты.
Қайрат Байбосынов 1969 – 1987 жылдары «Гүлдер» ансамблінің солист-воколисі, 1987 – 2009 жылдары Қазақ ұлттық консерваториясының профессоры, Жүсіпбек Елібеков атындағы Республикалық эстрда-цирк колледжінің директоры болды.
1992 – 2009 жылдары Қазақ ұлттық консерваториясының «Халық әндері» кафедрасының меңгерушісі қызметін атқарды.
2009 жылдан бастап Күләш Байсейтова атындағы Қазақ ұлттық өнер университетінің профессоры әрі «Халық әндері» кафедрасының меңгерушісі.
Жерлесімізді мемлекеттік атағымен құттықтап, шығармашылық табыс тілейміз.
Бағдат ҚАЗКЕНОВ.
