Оңтүстік Жезқазған кеніші № 65 шахтаның өздігінен жүретін жерасты техникасының машинисі Төлеген Лабақов пен оның қызы Шұғыла Жаңа жыл қарсаңында «Еуразия-1» арнасындағы «Koremiz Show» бағдарламасының «Менің әкем – ең жақсы адам» атты шығарылымына қатысып қайтты. Бұл бағдарламаға шақыртудың сырын Төлеген Лабақов бір мезетте желі жұлдызына айналғандықтарымен түсіндірді.
– Әлеуметті желіде блог жүргізу менің ойымда болған емес. Осыдан үш ай бұрын, қыркүйек айында әкеміз 60 жасқа толды. Асқар тауымызды құттықтауға бет алған кезіміз болатын. Көлікте отырып жас әнші Еркеш Хасеннің «Қызым» деген әнін орындадым. Әннің сөздерін де толық білмеймін. Тек қайырмасын айттым. Кенет артыма бұрылып қарасам, қызым көзіне жас алып отыр екен. Осы әсерлі сәтті зайыбым бейнежазбаға түсіріп алып, желіге жүктеген екен. Мен оны кейін білдім. Басында қатты мән бермеген болатынмын. Қаралым саны күн өткен сайын арта түсті. Қазір бұл бейнетүсірілімнің қаралымы 4 млн-ға жетті, – деді Төлеген.
Шұғыла Төлегенқызы 3-сынып оқушысы. Әкесі ән орындаған сәтте көзіне жас алған кішкентай ханшайымның бейнежазбадағы көрінісі көпшіліктің жүрегін елжіреткені анық.
– Мен үйдің тұңғышымын. Өзімнен кейін 4 інім бар. Әкемнің көлікте отырып, маған арнаған әні өте әсерлі шыққандықтан көңілім босап кетті. Өйткені, әннің мағынасын түсіндім, – деді Шұғыла.
Қызына ән арнап, желі жұлдызы атанған Төлеген Лабақов өндірісте жүрсе де өнерімен көпті тәнті еткен азамат. Отбасындағы әкенің балаларына деген ыстық ықыласын бір бейнебаянмен жеткізген Төлеген: «Өсіп келе жатқан балаларым байлығым. Сондықтан мен олардың тәрбиесіне де, білім алуына да ерекше мән беремін» – деп сөзін түйіндеді.
Бағдат ҚАЗКЕНОВ.
