Қала күні – тұрғындарды біріктіретін ерекше мейрам! Ол салтанатты жиынмен қоса түрлі мәдени, спорттық іс-шаралардың басын қосты сол күні. Атап айтқанда, Жезқазған қаласы күніне орай дәстүрлі CUPRUM RUN-2024 марафоны өтті. «Алаш» алаңында бастауын алған спорттық шараға қатысушыларды ҚР Парламенті Мәжілісінің депутаты Ерболат Сатыбалдин арнайы құттықтады.
– Сүйікті қаламыз Жезқазғанның 70 жылдығы құтты болсын! Мен жарыс ұйымдастырушыларына алғыс айтқым келеді. Себебі, бұқаралық спортты дамыту – мемлекет дамуының бір саласы! Барлық қатысушыларға сәттілік тілеймін! – деді ҚР Парламенті Мәжілісінің депутаты Ерболат Сатыбалдин.
Марафон 5 және 10 шақырым қашықтықтар бойынша өткізілді. Айта кету керек, «Қазақмыс Смэлтинг» пен жергілікті әкімдіктің бірлесе қолға алған спорттық шаралары дәстүрлі түрде ұйымдастырылып келеді.
– Бұл жарысты біз жыл сайын өткіземіз. Мұндағы «Қазақмыс Смэлтингтің» басты мақсаты – сүйікті қаламызда бұқаралық спортты дамыту. Тұрғындарға бұқаралық спортты насихаттау. Бұйыртса, келесі жылы да өткіземіз, – деді «Kazakhmys Smelting» ЖШС Бас директоры Жәнібек Байғабелов.
Маңызы зор марафон алдында барлық қатысушылар қаз-қатар тізіліп дене қыздыру жаттығуларын жасады да, Алашахан даңғылы бойынан жарысты бастады. Ұйымдастырушылардың айтуынша, жарыс деңгейі жыл сайын көтеріліп келеді. Мәселен, марафонға биыл 500-ге жуық адам қатысты.
Жарыс қорытындысы бойынша жас санаттарымен жеңімпаздар мен жүлдегерлерге дипломдар мен ақшалай сыйақылар табыс етілді.
– Мен марафон жарыстарына әрдайым қатысып тұрамын. Жезқазғанның 70 жылдығы құтты болсын, қаламыз жайнай берсін! Спорт саласы дами берсін! Жетістігім – туған қалама! – деді жарыс жеңімпазының бірі Асылмұрат Бірімжанов.
Айта кетейік, аталған додада мүмкіндігі шектеулі жандар да назардан тыс қалмады. Марафонның барлық қатысушылары естелік медаль мен арнайы спорттық жейделерге ие болды.
Гүлім МАРАТҚЫЗЫ.
