Шахта құрылысын салып, кеншілерге жол ашып жүрген Ғ. Омаров атындағы шахтапроходкалау тресі өткен жылдың орта тұсында Жезқазған қаласынан Сәтбаев қаласына қоныс аударды. Ұжымға жайлы ғимарат тауып, орналасу оңай болған жоқ.
Трестің директоры Қайрат Керімқұлов ұжымды дап-дайын, заманға сай ғимаратқа жайғастыруды ойлаған. Алайда, ондай сәулетт іғимарат кездеспеді. Қараусыз қалған «ПАТП» кәсіпорнының ғимаратын қайта қалыпқа келтіруден басқа амал болмады. Аңғал-саңғал күйдегі ғимараттың сол кездегі жағдайымен қазіргі келбетінде жер мен көктей айырмашылық бар. Бұл ғимаратты қайта қалпына келтіруге ұжымның әрбір қызметкері күш салды. ҚайратҰзақұлының басшылығымен телімдердің кабинеттері жаңаша үлгіде жасақталды. Әкімшілік ғимарат пен әрбір телімнің сыртқы есіктерін трестің өз еңбеккерлері жасап шықты. Бір сөзбен айтқанда, жаңа ғимарат трест ұжымының өз күшімен жанға жайлы жұмыс орнына айналды.
Айтуға оңай осы істі жүзеге асыру барысында еңбек пен шығармашылыққа ынталандыруға күш салынды. Мәселен, телім кабинеттерін талапқа сай жаңғырту бойынша байқау жарияланды. Соның нәтижесінде телімдердің басшылары мен әрбір жұмысшысы өз жұмыс орындарын ерекше дизайнмен әспеттеп шықты. Үздік шыққан телімдерді «КәсіпҚорған» кәсіподағы мен «JastarBolashaq» Жастар одағы марапаттады. Бұл қатарда «Еңбек» кәсіподағы да болды.
Үздік шыққандарды трест директоры Қайрат Керімқұлов марапаттап, ғимаратты жаңғырту жұмысына белсене атсалысқандарға алғысын білдірді. Байқау нәтижесінде бірінші орынды №17 мехономонтаж телімі жеңіп алса, екінші орынды №1 электрмонтаж телімі еншіледі. Құрылысшылар телімінің үлесіне үшінші орын тиді.
Жалпы, трест ғимаратындағы күрделі жөндеу жұмыстары әлі де жалғасуда. Болашақта ол асханасы, спорт залы бар үлкен кешенге айналмақ. Трест басшылығы мен еңбек ұжымының қажырлы да ынталы еңбегінің арқасында бұған да қолжеткізетін қуанышты күннің туатыны анық.
Бағдат ҚАЗКЕНОВ.
