«Қазақмыс Мэйнтенанс Сервисиз» ЖШС сервистік телім басшылары мен тау-кен, шахта жабдықтары зауытындағы цех басшыларының басқару дағдыларын дамытуға бағытталған бағдарлама өз бастауын алды.
Телім басшыларының компания жоспарлары мен жергілікті іске асыру арасындағы байланыстырушы буын ретінде атқаратын рөлі өте маңызды. Олар үдерістерді басқаруға, ұжымды ынталандыруға, қауіпсіздікті, тиімділікті және жұмыс сапасын қамтамасыз етуге жауапты. Жоспарлы көрсеткіштердің орындалуы басшылардың шешімдеріне байланысты. Сондықтан басшылық құрамға қойылатын заманауи талаптар үнемі ұлғайып келеді.
Бүгінде технологиялар мен үдерістерді түсіну жеткіліксіз. Ұжымды тиімді басқара білу, қиын жағдайларда шешім табу және әртүрлі деңгейдегі еңбеккерлермен байланыс орнату қажет. Сондықтан бұл курс сәтті басқару үшін қажетті құралдарды меңгеру бағытында ұйымдастырылды.
Бұл оқыту қызметкерлердің басқару құзыреттерін дамытуға бағытталған келесі жылға арналған кадрлық резервті қалыптастыру бағдарламасының бөлігі болып табылады.
Бағдарлама өзекті және практикалық тақырыптарды қамтиды. Атап айтқанда, көшбасшылық негіздері, тиімді қарым-қатынас әдістері, қызметкерлерді ынталандыру қағидаттары, өзгерістерді басқару және туындаған мәселелерді шешу.
Оқыту бағдарламасының бастау алуына орай «Қазақмыс Мэйнтенанс Сервисиз» ЖШС Бас директоры Саят Бәкіров жобаға сәттілік тілеп, компанияның алда атқарар жұмыстарының нәтижелі болуында білім мен ізденіс әрқашан маңызды екендігін жеткізді.
Бағдат ҚАЗКЕНОВ.
