Өткен сенбіде кеншілер қаласында шығатын «Аймақ ақшамы» газетінің сайтынан «Ұлытау облысында республикалық маңызы бар «СӘТБАЕВ» индустриялық аймағы құрылды» деген ақпарат көзіме шалынды. Бірақ, орысшасында «будет создана» деп жазылған екен.
Орысшасы мен қазақшасы қабыспаған ақпараттың анық-қанығын білу ниеті оянды. Сөйтіп, жан-жаққа сауал салдым. Облыс әкімінің баспасөз хатшысы Еркежан Ғалымжанқызы және «Ұлытау» әлеуметтік-кәсіпкерлік корпорациясының басшысы Алмат Жөкебаевпен сөйлесудің сәті түспеді. Ал, Сәтбаев қаласының әкімі Мұрат Бөрібаев бірден байланысқа шықты.
– Сәтбаев моноқаласының экономикасын әртараптандыруды жеделдету мақсатында республикалық маңызы бар индустриялық аймақ құру көзделген. Осы жылдың ақпанында сараптамалық кеңестің оң қорытындысы негізінде Ұлытау облысының әкімдігі «Республикалық маңызы бар «Сәтбаев» индустриялық аймағын құру туралы» қаулы қабылдады, «Ұлытау» ӘКК» АҚ басқарушы компания болып белгіленді.
Индустриялық аймақтың тұжырымдамасына сәйкес, қаланың батыс жағынан 12 гектар жер телімі бөлінді. Оны 50 гектарға дейін ұлғайту мүмкіндігі бар. Бүгінге дейін шетелдік 3 компаниямен импортты алмастыратын жобалардың пулы пысықталды. 100 жұмыс орнын құру жоспарланған. Жаңа жұмыс орнын құру арқылы өңір халқын жұмыспен қамту ұлғаяды, келешекте индустриялық аймақты дамыту (38 га. игеру) барысында 2 мыңға дейін жаңа жұмыс орнын құру көзделуде.
Сондай-ақ оқыңыз
Бюджетке жылдық түсімдер 1 млрд. теңгеден асады (оның ішінде жергілікті бюджетке – 129,7 млн. теңге). Жобаны іске асыру кезеңінде (2026 – 2045 ж.ж.) шамамен 20,6 млрд. теңгені құрайды, оның ішінде: республикалық бюджетке – 17,975 млрд. теңге, жергілікті бюджетке – 2,594 млрд. теңге.
Қалада алғаш рет индустриялық аймақ аумағында шикізат пен тауарларды тасымалдау логистикасын жеделдетуге, өндірілетін өнімнің өзіндік құнын төмендетуге, сондай-ақ, Сәтбаев қаласының басқа өңірлермен сауда-көлік байланысын күшейтуге және жүк транзитін ұлғайтуға мүмкіндік беретін теміржол тұйығы салынады.
Енді мемлекеттік, облыстық, жергілікті бюджеттен қаражат бөліп, инфрақұрылыммен қамтамасыз етуге кірісеміз. Канализация, электр желісі, су-жылу деген сияқты. Соның бәрі тартылып болғасын, құрылыс басталады деген үміттеміз, – деді кеншілер шаhарының басшысы.
«Сәтбаев» индустриялық аймағын құру инвесторлар мен кәсіпкерлер үшін кең мүмкіндікке жол ашады, мәселен:
Дайын инженерлік-коммуникациялық инфрақұрылым – барлық қажетті коммуникациялар жобалаушылардың жер телімінің шекарасына дейін жеткізіледі, бұл өндірістік нысанды іске қосу мерзімі мен шығынын қысқартады;
Жобаларды жүзеге асыру мерзімі қысқарады – инвесторлар толық дайындалған алаңға қол жеткізеді, бұл өндірістік нысандарды қатарға қосуды едәуір жеңілдетеді және жеделдетеді;
Дамыған логистикалық жүйе – теміржол тұйығы мен автомобиль жолының болуы товарларды тасымалдауды жеңілдетеді;
Жер телімдерін жалға алудың тиімді шарттары – кейіннен сатып алу арқылы аукцион өткізбей жалға алу мүмкіндігі;
Мемлекеттік қолдау – индустриялық аймаққа қатысушылар қолданыстағы мемлекеттік бағдарламалар шеңберінде қаржылық және қаржылық емес қолдауға сенім арта алады;
«Бір терезе» қағидаты бойынша жобаларды сүйемелдеу – жобаны іске асырудың барлық кезеңінде, басынан бастап пайдалануға берілгенге дейін жан-жақты қолдау көрсету.
Республикалық маңызы бар «Сәтбаев» индустриялық аймағы бизнес үшін қолайлы жағдай жасап, отандық және шетелдік инвестиция тарта отырып, өңірдің индустриялық дамуының негізгі орталығына айналуды көздейді.
Әлібек ӘБДІРАШ.
