ҚР Денсаулық сақтау министрлігі «Денсаулық» мемлекеттік бағдарламасы аясында бастапқы медициналық-санитарлық жәрдемді (БМСЖ) жетілдіру бағытында жұмыс жүргізуде.
Қалалық қоғамдық кеңестің отырысында облыстық денсаулық сақтау басқармасының басшысы Ләззат РАНОВА кеншілер қаласында осыған сәйкес атқарылып жатқан іс-шара жайлы баяндады.
БМСЖ қызметі мен құрылымының негізгі бағыты сала министрлігінің 2023 жылғы 30-наурыздағы №49 бұйрықта айқындалған. Олар: диагностика, емдеу, балалар мен ересектерді профилактикалық тексеру, ауырудың тәуекел факторларын ертерек айқындау мен мониторингтеу, қалпына келтіретін ем-дом мен медициналық оңалту, салауатты өмір салтын қалыптастыру.
Сондай-ақ, емханаға бекітілген азаматтардың кең көлемді медициналық көмек алуына мүмкіндігі бар. Ол жалпы тәжірибе дәрігерінің қабылдауын, тегін дәрі-дәрмекпен қамтамасыз етуді, диагностикалық іс-шараны, жедел жәрдемді және тағы басқа көптеген маңызды қызметті қамтиды.
Сондай-ақ оқыңыз
БМСЖ-ға аумақтық жақындықты қамтамасыз ету мақсатында денсаулық сақтау мекемелері желісінің мемлекеттік нормативі қайта қаралды. Биылдан бастап бірқатар медициналық қызмет ұялы телефонның «eGovmobile» қосымшасы арқылы жүзеге асырылатын электронды түріне көшіріледі. Олар: зертханалық зерттеу нәтижесі, электронды рецепт, жүктілік бойынша есепке алу, медициналық мекемеге бекіту, қабылдауға жазылу және үйге дәрігер шақыру, мүгедектігін сырттай куәландыруға жолдама алу, т.б.
Медициналық қызмет көрсетуді жақсарту және жұртшылыққа қолжетімділігін қамтамасыз ету мақсатында былтыр желтоқсанның аяғына қарай пациенттер кеншілер қаласындағы «Дарис» медициналық орталығына қайта бағытталды. Онда созылмалы жүрек сырқаты бар науқастарды тұрақты динамикалық бақылау, іріктеу, жоғары технологиялық медициналық жәрдем түрін көрсетуге дайындау мен жолдама беру үшін биыл 5-қаңтарда арнайы кабинет ашылды. Сондай-ақ, ана өліміне жол бермеу және сәбидің шетінеуін шектеу мақсатында жоғары тәуекелділік (коло-ректальды обыр) кабинеті ашылып, жұмыс істеуде.
Былтыр қалалық орталық аурухананың барлық корпусына күрделі жөндеу жүргізіліп, жылу беру және сумен жабдықтау жүйесі жаппай жаңартылды. Желтоқсанда баланың есту әлеуетіне аудиологиялық скрининг жасайтын жабдық, патронаждық дәрігер УЗИ-планшет алынды. БМСЖ-ның барлық медициналық мекемесінде диспансерлеу кабинеті ашылып, қажетті құрал-жабдықпен қамтамасыз етілді, ЭКГ телеметрия, УЗИ-планшеттер алынды.
Облыстағы жастар орталығына қарасты үш кабинеттің біреуі кеншілер қаласындағы емханада орналасқан. Онда пациенттерді қолдау қызметі, созылмалы жүрек сырқаты барларды қабылдауға арналған кабинет, жас ана мен отбасын жоспарлау кабинеті, сәбидің туабітті сырқатын анықтайтын КСВП аппараты, қан қысымына тәуліктік мониторг жасайтын құрылғы бар. Күндізгі стационар қабдықталған.
Медицина мекемелерінде маманға зәрулікті жою бағытында бірқатар жұмыс жүргізілді. Өткен жылы қалалық орталық ауруханаға директордың емдеу ісі жөніндегі орынбасары, анестезиолог-реаниматолог дәрігер, акушер-гинеколог, бала дәрігері, неонатолог дәрігер жұмысқа қабылданып, көші-қон шығыны төленді, жалдамалы баспанамен қамтамасыз етілді. Қалалық емханаға жеті дәрігер келді: былтыр бір ревматолог, бір сарапшы, бір терапевт, үш жалпы тәжірибелік маман, биыл бір оташы.
Уролог, эндокринолог, онколог, маммолог, офтальмолог, невропатолог, оташы мамандарын даярлау үшін жоғары оқу орындарымен келісім-шарт жасалған.
Әлібек ӘБДІРАШ, қалалық қоғамдық кеңестің мүшесі.
Сәтбаев.
