Қазақстанның кен өндіру, байыту, түсті металлургия салаларында өзіндік қолтаңбасын қалдырған техника ғылымдарының кандидаты, Ленин, Октябрь революциясы, Еңбек Қызыл Ту ордендерінің иегері, КСРО Мемлекеттік сыйлығының лауреаты, Қазақ КСР еңбек сіңірген кеншісі Далабай Ешпановтың есімі Жезқазған, Балқаш жұртшылығына кеңінен танымал.
Жезқазған алып шахталарының құрылысы мен игерілуі, өздігінен жүретін қондырғыларды қолдана отырып кен өндіруді игеру, байыту фабрикаларының жаңа қуатын енгізу мен мыс балқыту зауытын игеру секілді жұмыстардың жүзеге асуында Далабай Оспанұлының орасан еңбегі бар.
Балқаш тау-кен металлургиялық комбинатын басқарған жылдарында өндіріске мыс қорытуда автогендік технологияны енгізу жүзеге асты. Тұлғаның осы еңбегін ескере келіп, «Қазақмыс Смэлтинг» ЖШС Бас директоры Жәнібек Байғабелов Балқаш қаласындағы политехникалық колледж студенттеріне Далабай Ешпанов атындағы шәкіртақы тағайындалғанын жеткізді.
Өндіріс ардагерінің Балқаш қаласында тұрған үйінің (мемориалдық тақта орнатылған) маңында өткен жиында Далабай Оспанұлының көзін көрген қатарластары, ұрпақтары оның үш бірдей салаға сіңірген еңбегі жайлы сыр шертіп, естеліктер айтты.
Сондай-ақ оқыңыз
Бағдат ҚАЗКЕНОВ.
