«Қазақмыс Смэлтинг» ЖШС бас директоры Жәнібек Алтынбековтің ұйғарымымен Балқаш мыс балқыту зауытының өркендеп, дамуына айрықша үлес қосқан техника ғылымдарының кандидаты Далабай Ешпанов атындағы шәкіртақы тағайындалған болатын.
Далабай Ешпанов – Ленин, Октябрь революциясы, Еңбек Қызыл Ту ордендерінің иегері, КСРО Мемлекеттік сыйлығының лауреаты, Қазақ КСР еңбек сіңірген кеншісі.
Жақында «Қазақмыс» корпорациясы» ЖШС Балқаш қаласындағы политехникалық колледжінде тұңғыш рет тағайындалған шәкіртақыға қол жеткізген студенттерге шәкіртақы салтанатты жағдайда табысталды.
Аруана Жанасықова, Екатерина Рихтер, Зарина Несіпбек алғашқы шәкіртақының иегерлері атанды. Жалпы, бұл шәкіртақының іріктеу байқауына 154 студент өтінім берген. Оның ішінен 12 студент екінші кезеңге өткен. Он екінің ішінен үш студент 2024 жылдың шәкіртақысына ие болып отыр.
Бағдат ҚАЗКЕНОВ.
