№3 жалпы білім беретін мектепте ҚР ІІМ «Сұңқар» әскери арнайы жасағының командирі, полиция подполковнигі Ерден Сауытовты еске алу шарасы өтті.
Аталған мектептің түлегі Ерден Сауытовты еске алып, құрмет көрсету білім ошағында дәстүрге айналған. Полиция подполковнигі 1975 жылы Шахтинск қаласында дүниеге келген. Еңбек жолын, 1993 жылы бастады. Ол республика аумағында орын алған көптеген күрделі операцияларға және қауіпті қылмыскерлерді ұстауға қатысты. 1996 жылы ҚР Ішкі істер министрлігінің «Сұңқар» арнайы жасағына ауыстырылады. Ол әзірлеген арнайы күштерді даярлау әдістерін елдің көптеген арнайы бөлімшелері әлі күнге дейін қолданып келеді. Шараны Ұлытау облыстық ішкі істер органдары ардагерлер кеңесінің төрағасы Аманбек Мұқатаев ашып, жүргізіп отырды. Жиынға арнайы шақырылған Алматы қалалық ішкі істер органы және ұлттық гвардия ардагерлер кеңесінің төрағасы генерал-майор Сағынжан Асыл-Кеңей «Қазақстан полициясына – 30 жыл» Құрмет грамоталарын полиция қызметкерлері мен ардагерлеріне және мектеп басшылығына табыстады.
Іс-шараның бірінші бөлігінен кейін «Арлан» жауынгерлері өнер көрсетті. Бұдан соң 6-8-сынып оқушылары арасында Ерден Сауытовты еске алуға арналған волейболдан мектепішілік турнирі басталды.
Сондай-ақ оқыңыз
Әріптестері Ерден Сауытовты ұжымда беделді, өз ісінің нағыз маманы ретінде еске алады. Ол кәсіби деңгейін үнемі жетілдіріп отырған. Қамқор әке, адал жар да бола білген. «Елі барда Ерденнің есімі ұмытылмайды. Оның ерлігі бейбітсүйгіш жастар үшін үлгі», – дейді жақындары.
Гүлім Маратқызы.
