Биыл Тәуелсіз Қазақстанның басты құжаты – Конституциямызға 30 жыл толып отыр. Бұл – ел тарихындағы елеулі белес, барша қазақстандықтың жүрегіне қуаныш пен мақтаныш сыйлайтын мереке.
Ұлытау – қазынаға бай өлке, кенді аймақ. Біз, осы өңірдің кеншілері жер қойнауындағы байлықты игеріп, оны халық игілігіне жарату жолында адал еңбек етіп келеміз. Кен өндіру – ауыр да жауапты жұмыс. Жер астындағы еңбектің қиындығын, қауіп-қатерін тек осы салада жүрген жандар ғана жақсы біледі. Сондықтан да біз үшін еңбек құқығы мен қауіпсіздігінің заң жүзінде қорғалуы – үлкен демеу.
Ата Заңымыздың 24-бабында «Әркімнің еңбек ету бостандығына, қауіпсіздік пен гигиена талаптарына сай еңбек жағдайына құқығы бар» деп нақты көрсетілген. Бұл бап – біз сияқты ауыр еңбектің иелеріне мемлекет тарапынан жасалған зор қамқорлық. Қауіпсіздік шараларының күшеюі, еңбекақы мен әлеуметтік кепілдіктердің жақсаруы – Конституция негізінде жүзеге асып отырған игілікті істер.
Осыдан отыз жыл бұрын қабылданған Ата Заңымыз – елдің берекесін арттырып, татулығын нығайтқан темірқазық. Бүгінде біз бейбіт аспан астында еңбек етіп, ұрпағымыздың ертеңіне сеніммен қараймыз. Бұл – тәуелсіздіктің, заң үстемдігінің және ел бірлігінің жемісі.
Ұлытау өңірінің кеншілері атынан барша отандастарды Қазақстан Конституциясының 30 жылдық мерейтойымен құттықтаймын! Елдігіміздің айнасы – Ата Заңымыз әрдайым биік тұрып, халқымыздың еңбегін қорғап, мемлекетіміздің мерейін үстем ете берсін!
Ақбейсен Қайырбеков,
«Жомарт» кенішінің кеншісі.
