«Қазақмыс» корпорациясы» ЖШС құрамындағы «Нұрқазған» кенішінің басшылығы мен «КәсіпҚорған» кәсіподағы комитеті 28 сәуір – Дүниежүзілік Еңбекті қорғау күнін мазмұнды ұйымдастырды.
«Нұрқазған» тау-кен өндірісінің бас директоры Мұқан Үңгітбаев бастаған ұжым бұл күні спорттың 7 түрінен өздерінің салауатты өмір салтына деген беріктіктерін байқатты. Арнайы келген құрметті меймандар «Нұрқазған» кеніші ұжымының спорттағы ептілігіне риза болды. Әсіресе, Бұқар жырау ауданының әкімі Ерлан Құйсайынов кеншілердің қандай істе болсын мықты екендіктерін алға тартып, атаулы күнмен құттықтады.
Қазақша күрес, қол күресі, арқан тарту, кір тасын көтеру, турникке тартылу, волейбол, шағын футбол сынды ойын түрлерінен үздіктер анықталып, марапатталды.
Еңбекті қорғау күні аясында «КәсіпҚорған» кәсіподағы комитетінің төрағасы Айбын Арынғазинов техника қауіпсіздігі және еңбекті қорғау бөлімінің қызметкерлерін құттықтап, мерекелік сый-сияпат тапсырды. Кеншілердің қауіпсіз еңбек етіп, шахтаға жайлы жағдайда түсуіне үлес қосып жүрген әкімшілік-тұрмыстық кешеннің еңбеккері Гүлнарай Сағидолда кәсіподақтың «Еңбек озаты» төсбелгісін тақты.
Еңбек қауіпсіздігін алдыңғы қатарға қоя отырып, кен өндіру ісін жоспардан асыра орындап отырған «Нұрқазған» кеніші қауіпсіздік саясатына әрқашан бекем екендіктерін дәлелдеп келеді.
