Біз Ұлы Отан соғысының зардабын шеккен буынның ұрпақтарымыз. Қан майданда Отан алдындағы борышын ақтаған әкелеріміздің ерлігі біздің жадымызда, сол әкелеріміздің Отан қорғаудағы жанқиярлық ерлігін ұлықтау, өскелең ұрпаққа жеткізу бізге жүктелген ауыр болса да абройлы міндет екені айдан анық.
Биылғы жылдың 14 қазанында Ұлы Отан соғысының ардагері, «Қызыл Жұлдыз», «Даңк» орденінің толық иегері Жақсымбек Тілеуұлы Үншібаев 100 жасқа толды. Ерлігі ерен батырды еске алу мақсатында «Қазақмыс» корпорациясы» ЖШС жанындағы «Ардагерлер кеңесінің» басқарма төрағасы Төлеген Нұрмағанбетұлы Бүкіровтың бастамасымен ағамыздың соңғы қызмет орны Сәтбаев тұрғын үй шаруашылығының Сәтбаев даңғылындағы №98 үйінде орналасқан бұрынғы кеңсесіндегі ескерткіш тақтасының ескіруіне байланысты 2020 жылы жаңасын орнаттық .
Биылғы жылдың басында батыр ағамыздың ұрпақтарымен ақылдасып, Төлеген Нұрмағанбетұлының ұсынысымен Жақсымбек ағаға Сәтбаев қаласының көрнекті жерінен бюст орнату қолға алынды. Осы орайда қаржылай көмек көрсеткен «Қазақмыс» корпорациясы басшылығына алғысымызды білдіреміз.
Өз тарапымыздан №1, №4 мектептерде, Достық үйінде, Сәтбаев қаласының мұрағатында жастармен кездесу өткіздіп, батыр ағамыздың ерлігін паш етіп, ардагерлеріміз батыр ағамыздың өмір жолын бір саралап өтті.
Сәтбаев қаласының Тағзым алаңында орналасқан Ж.Үншібаевтың бюстінің жанында 27 қыркүйекте Отан қорғауға әскер қатарына шақырылған азаматтарымызды шығарып салу салтанатына қатыстық. Бұл шаралар келешекте жалғасын табады деген сенімдеміз. Батыр аталарымыздың жарқын бейнесі мәңгі есімізде сақталады.
Ә. Мулақов, «Қазақмыс» корпорацисы» ЖШС жанындағы Ардагерлер кеңесі Сәтбаев филиалының басшысы.
