«КәсіпҚорған» кәсіподағы Жезқазған филиалы мен «Қазақмыс» корпорациясы» ЖШС еңбеккерлерінің «Jastar Bolashaq» Жастар одағы ұйымдастырған «Қыс қызықтары-2025» қысқы спартакиадасы өз жеңімпаздарын анықтады.
«Қазақмыс» компаниялар Тобының Жезқазған аймағындағы кәсіпорындарының еңбеккерлері қатысқан жарыс жоғары деңгейде өтті. «Қыс қызықтары –2025» бағдарламасы эстафеталық ойындар, жылдамдыққа сырғанау, самаурын қайнату, қардан жасалған мүсіндер, шаңғымен сырғанау сынды жарыстарды қамтыды. Эстафеталық ойындардың қорытындысы бойынша І орынды жылу-энергетика кәсіпорны жеңіп алса, ІІ орынды мамандандырылған жөндеумеханикалық басқармасы еншіледі. ІІІ орынды энергетика басқармасы иеленді. Жылдамдыққа сырғанаудан «Қазақмыс Мэйнтенанс Сервисиз» ЖШС ұжымы І орынмен марапатталды. ІІ орын Жезқазған байыту фабрикалары ұжымына тиесілі деп танылды. Тау-кен жобалау институтына ІІІ орын берілді. Самаурын қайнатуда «Tranco Eхpress» ЖШС ұжымы жеңімпаз атанды. Мамандандырылған жөндеу-механикалық басқармасына ІІ орын бұйырса, тау-кен жобалау инситуты ІІІ орынды қанағат тұтты. Қардан мүсін жасаудан энергетика басқармасы үштіктің көшін бастады. ІІ орынды сапаны бақылау департаментінің ұжымы алды. «Батыс» кеніші бұл жарыста ІІІ орынды місе тұтты.
Шаңғымен сырғанаудан ерлер арасында энергетика басқармасынан Сержан Кәрімов І орынды жеңіп алса, Қарсақбай металлургиялық зауытынан келген Бейбарыс Асан ІІ орынға ие болды. ІІІ орынды Жезқазған мыс қорыту зауытынан Нұрболат Қалахметов алды. Әйелдер арасында «Tranco Jezz» ЖШС-нен Валентина Майстеренко қарсыластарын шаң қаптырып мәреге бірінші жетті. Жылу-энергетика кәсіпорнынан Гүлнұр Дүйсенбекова ІІ орынмен марапатталды. Мамандандырылған жөндеу-механикалық басқармасынан Индира Таубаева ІІІ орынға табан тіреді.
Командалық ойындар нәтижесінде қысқы спартакиаданың алғашқы жеңімпазы энергетика басқармасының ұжымы деп танылды.
Бағдат ҚАЗКЕНОВ.