Қоғамның дамуы мен қалыптасуында бұқаралық ақпарат құралдарының алатын орны айрықша! «Дидар» телеарнасы – осыдан алпыс үш жыл бұрын өмірге келіп, Жезқазған-Ұлытау аймағының шежірешісіне айналған қасиетті қарашаңырақ. Телеарна тынысында үлкен өзгеріс, үлкен жаңалықтар бар…
1959 жылы инженерлер идеясымен мысты шаһарда әуесқой телевизиялық студия құрылды. 1965 жылы Жезқазған кен-байыту комбинатының қомақты қаражатын тарта отырып, әуесқой телевизиялық студия базасында оны қайта құру жұмыстары жүргізілді. Содан бері, біздің телеарна киелі өңірдің жағымды жаңалықтарын да, жанайқайларын да жұртқа жүйелі түрде жеткізіп келеді. Ұлытау облысының құрылуы мен мысты шаһардың қайтадан облыс орталығы атануы өңірдегі барлық салаға оң өзгерістер әкелуде. Кешегі аймақтық «Дидар» телеарнасы 20 желтоқсаннан бастап эфирге «Ұлытау» облыстық теле-радио компаниясы болып шықты. Ұлт ұясына баланған Ұлытау облысының «Ұлытау» теле-радио компаниясы жаңа облыстың тарихын жазуға кірісті. Телеарна архивінде Жез қаланың қазығы қағылған күннен бастап, қазіргі күнге дейінгі аралық сол қалпында сақтаулы. Сонымен қатар, «Қазақмыс» сынды әлемдегі қуатты кәсіпорынның әрбір шыққан белесі мен биігі жайлы мәліметтер де біздің мұрағаттан табылады. Ақпарат саласындағы ауқымды жұмыстар әрі қарай да жалғасын табады. Арна қызметкерлерінің дені жалынды жастар. Демек, телеарнада тер төккен аға буын өкілдерінің лайықты ізбасарлары да бар деген сөз. Арнаның жаңалықтар қызметі аптасына 5 күн бойы, екі тілде эфирге шығады. Сонымен қатар күндізгі жаңалықтарымыз 12 қыркүйектен бастап іске қосылды. Телеарна тілшілері күнделікті орын алып жатқан айшықты оқиғалардан сюжеттер мен арнайы репортаждар әзірлеп, көпшілікті құлағдар етеді. Коммерциялық бағдарламаларымыз сол күйі қалады. Ұлытаудың төрінде «Ұлытау» телеарнасы қосулы болсын!
Гүлім МАРАТҚЫЗЫ.
