Сәтбаев қаласында «Дарабоз» зияткерлік ойыны қорытындыланды. Қала әкімі Мұрат Бөрібаев ойынға қатысушыларды құттықтап, сәттілік тіледі. Осы уақытқа дейін Қаныш Сәтбаевтың 125 жылдығына, С. Сейфуллиннің 130 жылдығына, сондай-ақ Абай күні қарсаңында ақынға арналған үш іріктеу ойыны өтті.
Іріктеуден өткен 9 қатысушы финалда бақ сынады. Финалдық ойынның тақырыбы қазақтың ежелгі астанасы Ұлытауды қамтыды. Ойында үш айналым – «Тізгін қағар», «Желдірме», «Бәйге» болды. Бірінші айналым бойынша қатысушылар тест тапсырмасын орындайды. Екінші айналым бойынша белгілі тұлғалардың нақыл сөздерін талдап, ой тереңдігін, сөз саптауын көрсетеді. Үшінші айналым ұлттық құндылыққа бағытталған. Ақтық сында қазақтың ою-өрнегі туралы сөз қозғалды, оюдың атауы, қолданылатын орны . Іріктеу ойындарында қазақы жыл қайыру, ұлттық өлшем бірліктер, ұмыт болған ұлттық ойындар турасындағы тапсырмаларды қамтыды.
«Дарабоз» зияткерлік ойын қорытындысы бойынша ІІІ орынға тігілген 100 мың теңгені Қаныш Сәтбаев атындағы мектептің мұғалімі Айжан Әбілқасымова алса, ІІ орынға тағайындалған 150 мың теңгені Қарағанды мемлекеттік университетінің студенті Алуа Іргебай еншіледі. І орынның жеңімпазы Қаныш Сәтбаев атындағы мектептің биология пәнінің мұғалімі Мөлдір Аманқұлова 200 мың теңгені қанжығалады. Сондай-ақ, бірнеше қатысушы ынталандыру сыйақысын алды.
Зияткерлік ойынның өтуіне «Ұлар» әдеби клубы ұйытқы болды. Жүлде қорына жергілікті меценат азаматтар, «Қазақстанның халық батырлары» ҚБ Ұлытау облысы бойынша төрағасы, Қазақстанның Еңбек Ері, кенші Тұрсынбек Мақышев, «Amanat» партиясы «Қазақмыс» корпорациясы» ЖШС жанындағы Ұлытау облыстық филиалының атқарушы хатшысы Асқар Нұржанов демеушілік көрсетті.
Бағдат ҚАЗКЕНОВ.
