«Біртұтас тәрбие бағдарламасы» жобасы аясында шаһарымыздағы № 10 жалпы білім беретін мектебінде «Ата-аналарды педагогикалық қолдау орталығының» ұйытқы болуымен «Даналық мектебі» іс-шарасы ұйымдастырылды.
«Ата-аналарды педагогикалық қолдау» орталығының негізгі мақсаты: балаларды оқыту және тәрбиелеу мәселесі бойынша мектептің ата-аналармен қарым қатынасын күшейту, сондай ақ берекелі отбасы мәдениетін дамыту болып табылады. Аталған бағыттағы ілкімді шаралар мен келелі жиындар өткізуге оқу ордасынан арнайы кабинетте ашылған.
– Мемлекет басшысы Қасым-Жомарт Кемелұлы Тоқаев Түркістан қаласында өткен ІІ Ұлттық құрылтайда сөйлеген сөзіндегі «Біртұтас тәрбие» бағдарламасын кешенді іске асыру мақсатында біздің №10 жалпы білім беретін мектебінде, ата-аналарды педагогикалық қолдау орталығы бойынша бірнеше іс-шаралар ұйымдастырылуда. Оның ішінде «Даналық мектебінде» әже өсиеті, ата ақылы, ағалар мектебі, аналар мектебі өз жұмысын бастады, – дейді № 10 ЖББМ директорының тәрбие ісі жөніндегі орынбасары Бекзат Парманкулова,
Ал, жас маман Айгерім Сламбектің пайымынша «Даналық мектебі» – тәрбие тірегі. Ол – мектептің, ата-ана, оқушы үштағанын біріктіруші.
– Бүгінгі таңда білім саласының көптеген реформаларына халықтың еті енді үйренісіп келе жатыр. Осы орайда біздің мектебімізде «Даналық мектебі» клубы жұмыс жасауда. Бұл клубтың басты мақсаты: ата-аналармен тығыз қарым-қатынас жасау және клубтан күтілетін нәтиже – позитивтті ата -ана мәдениетін қалыптастыру, – дейді ол.
Мұғалім, оқушы, ата-ана үштігінің мектептегі ілім мен тәрбие шеңберінде бірлесе жұмыс істеуі – саналы ұрпақ тәрбиелеу бағытында өз жемісін беруде екен. Бұл жобаға қатысушы ата-аналардың пікірі…
– Қазақ айтады «Бір жылдығыңды ойласаң егін ек, жүз жылдығыңды ойласаң тал отырғыз, мың жылдығыңды ойласаң ұрпақ тәрбиеле». Жалпы ұстаз бен ата-ананың арасындағы тығыз қарым-қатынас бала өміріне үлкен ықпал ететін ақиқат. Бүгінгі ұстаздар осындай елдің баласын тәрбиелеп, жақсы кірпіштерді қалап жатқан жайы бар, – дейді Нұрладдин Саркеев.
«Ұяда не көрсең, ұшқанда соны ілерсің» деген. Отанның отбасынан, тәрбиенің тал бесіктен басталарын ескерген ұйымдастырушылар мұндай шаралар легін әрі қарай да жалғастыра бермек.
Гүлім МАРАТҚЫЗЫ.
