Мақсатқа жету үшін корпорация мен ҚР Үстел теннисі федерациясы өзара ынтымақтастық туралы меморандумға қол қойып, Ұлытау өңірінде бірлесіп өткізетін іс-шаралар мен спорттық оқиғалардың жоспарын құрды.
«Бүгін біз өзара қолдау көрсету, үстел теннисін насихаттау, бірлескен жобаларға қатысу және ынтымақтастықтың басқа да түрлерін дамыту мақсатында меморандумға қол қойдық. Биыл бірнеше ірі іс-шара өткізуді жоспарлап отырмыз – оның ішінде үстел теннисі бойынша «KAZAKHMYS OPEN» ашық республикалық турнирін, сондай-ақ Жезқазған қаласында өтетін үстел теннисі бойынша тәуелсіз Қазақстан тарихындағы алғашқы республикалық чемпионатты айтуға болады», – деді меморандумға қол қою рәсімінде ҚР Үстел теннисі федерациясының бас хатшысы Данил Пак.
Бұдан бөлек Ұлытау облысының спортшыларына арналған оқу-жаттығу жиындары, Қазақстанның еңбек сіңірген жаттықтырушыларының қатысуымен жаттықтырушыларға арналған семинар, 2016, 2020 және 2024 жылдардағы Олимпиада ойындарына қатысқан әйгілі спорт шеберлерімен бірлескен шеберлік сағаттары және басқа да іс-шаралар өткізу жоспарланған.
«Біз балалар мен жасөспірімдер арасында жарыс өткіземіз, жаттықтырушылар құрамының әлеуетін дамытамыз, спорт төрешілерін дайындаймыз. «Қазақмыс» компаниясының қолдауы бізге осы міндеттерді іске асыруға және осы спорт түрін жаңа деңгейге көтеруге мүмкіндік береді», – деп атап өтті Данил Пак.
«Қазақмыс» корпорациясы Тұрақты даму және коммуникациялар жөніндегі басқарушы директор Сәкен Шаяхметовтың айтуынша, қол қойылған меморандум әлеуметтік жағдайды жақсартуға және компания қызмет ететін өңірлерді, оның ішінде Ұлытау облысын дамытуға бағытталған жобаларды одан әрі жүзеге асыруға мүмкіндік береді.
– Жыл басында біз «Жігер» спорттық-сауықтыру кешенін аштық. Оның базасында барлық стандартқа сай аккредиттелген үстел теннисіне арналған спорт залы бар. Бұл зал спорттық іс-шаралар мен күнделікті жаттығу өткізу үшін пайдаланылады. Республикалық Федерациямен ынтымақ-
тастық өңірде теннистің дамуына қуатты серпін беріп, осы спорт түріне бұқаралық сипат береді. Қол қойылған меморандумның нәтижесінде Жезқазғанды, кейін өзге де өңірлерді елдің спорттық картасына енгізіп, болашақта әлемдік деңгейдегі таланттарды тәрбиелей аламыз деп үміттенеміз, – деп түйді ойын Сәкен Шаяхметов.
Бұдан бөлек, «Қазақмыс» Балқаш қаласында дене шынықтыру-сауықтыру кешенінің жобалау жұмыстарына кірісті. Бұл кешенде үстел теннисі залы да қарастырылады.
Айта кету керек, Қазақстанда үстел теннисімен жүйелі түрде 260 мыңнан астам адам шұғылданады. 10,5 мыңнан астам спортшы күнделікті жаттығумен айналысады, олармен 400-ге жуық жаттықтырушы жұмыс істейді. Айта кету керек, еліміздің барлық 20 өңірінде балалар мен жасөспірімдерге арналған спорт мектептері жұмыс істейді, бұл мектептерге балалар 6 жастан бастап қабылданады.
