Мұрағаттағы тектік қор иелерінің құжатынан алынған сурет көрмесі осылай аталады. Оны қалалық мемлекеттік мұрағаттың қолдауымен № 27 мектеп ұжымы ұйымдастырды.
Көрменің ашылу салтанатында майдангерлер Түсіпбек Молақов пен Күнтуған Дәуітовтың балалары – «Қазақмыс» корпорациясы Ардагерлер кеңесі Сәтбаев филиалының басшысы Әбуләйіс Молақов пен зейнеткер Ғабидолла Дәуітов әке туралы есті естелік айтты.
Ардагер кенші, «Құрмет» орденінің иегері Дәлет Айқынбаев пен ұлағатты ұстаз, «Ақ әжелер» ансамблінің белсенді мүшесі Тұрсынбике Сәдуақасова тылда тынымсыз тер төгіп, Жеңісті жақындатуға өлшеусіз үлес қосқан ата-анасы жайында сыр шертті.
Қалалық мемлекеттік мұрағаттың басшысы Аян Жыңғылбаев тектік қор иелерінің ұрпағын Алғыс хатпен марапаттады. Жергілікті өнерпаздар орындаған әсем ән мен мың бұралған би салтанат сәнін келтірді.
Әлібек ӘБДІРАШ.
Сәтбаев қаласы.
