Ұлытау облысында ұстаздардың облыстық тамыз конференциясы өтті. конференцияның пленарлық отырысына 2000-ға жуық педагог офлайн және онлайн режимінде қатысты. Бұл жылғы педагогтардың алқалы жиыны «Білім келешегі: адал азамат, кәсіби маман» тақырыбында өтті.
Кеңес аясында «Цифрлық білім берудің болашағы» көрмесі ұйымдастырылды. Көрмеде білім беру саласында сапалы цифрлық контентті қамтамасыз етуге бағытталған жаңа технологиялар, түрлі ресурстар, электрондық зертханалар мен білім алушылардың робототехника, STEM бағытындағы жетістіктері ұсынылды.
Конференцияға Ұлытау облысының әкімі Дастан Рыспеков, ҚР Оқу-ағарту министрлігінің Білім саласында сапаны қамтамасыз ету комитетінің төрағасы Серік Әшіров арнайы қатысты. Аймақ басшысы Дастан Адайұлы:
– Тамыз конференциясы – еліміздің білім беру жүйесін дамытып, педагогтердің кәсіби біліктілігін арттыруға, алдағы оқу жылына жаңа серпін беретін маңызды алаң.
Биылғы тамыз конференциясы «Білім келешегі: адал азамат, кәсіби маман» тақырыбында өтуде. Бұл – жас ұрпақты тәрбиелеудегі басты басымдықтарымызды айқындайтын мазмұны терең тақырып. Бұл алаңда тұжырымды ойлар айтылып, жаңа идеялар ұсынылатына сенімдімін.
Қазақтың ұлы ойшылы, ақын Абайдың «Толық адам» тұжырымдамасы ақыл, қайрат, жүректі бірдей ұстасаң ғана толық боласың деген ұстанымының түйіні, идеясы мемлекеттік саясатымыздың негізгі өзегіне айналып отыр. Мемлекет басшысы жариялаған «Адал азамат» тұжырымдамасы осы негізге табан тірейді. Президентіміз «Ұлттық құрылтайда» белгілеп берген озық ойлы ұлтқа тән қасиеттер де ғұламаның өсиеттерімен үндес. Отаншылдық, адамгершілік, білімпаздық, нағыз маман болу, үнемшілдік, еңбекқорлық, ел мен жерге жанашырлық сияқты асыл қасиеттер бәрінен биік тұруға тиіс. Осындай ізгі қасиеттің бәрін бойына сіңірген жанды Адал азамат деген бір ауыз сөзбен сипаттауға болады, – деді.
Сондай-ақ Дастан Адайұлы облыс аумағындағы білім ошақтарын уақыт талабына сай жаңғырту бағытындағы жасалып жатқан жұмыстарды да атап өтті.
«Білім беруде жасанды интеллектіні қолдану», «Цифрлық білім беру: Жасанды интеллект. STEM», «Жұмысшы мамандықтар жылы аясындағы өңірлік бастамалар: тәжірибе және болашағы» тақырыптарында тәжірибе бөлісу баяндамалары жасалды.
Сонымен қатар облыс әкімі бірқатар педагогті Білім беру ісінің құрметті қызметкері, Оқу-ағарту министрлігінің алғыс хатымен, Ұлытау облысының Құрмет грамотасымен және облыс әкімінің алғыс хатымен марапаттады.
Пленарлық сессия – жас ұрпаққа сапалы білім, саналы тәрбие беру бағытындағы мақсат-міндеттерді нақтылайтын бас қосу. Мемлекеттің идеологиясы, қоғамның дәстүрі мен құндылықтары, адамзаттың асыл қасиеттері, ғылым мен өнердің мұралары ұстаздар арқылы ұрпақтан-ұрпаққа жол тартады.
