Шығыс Қазақстан облысының Аягөз ауданында «Қазақмыс корпорациясы» ЖШС-нің иелігіндегі «Құсмұрын-Ақбастау» кеніші орналасқан.
Онда мыс-сульфидті кенді ашық және жер асты тәсілдерімен өндіреді. Кен орындарының қашықтығына байланысты мамандар вахталық әдіспен жұмыс істейді. Мұнда табысты еңбек етіп жүрген еңбеккерлердің қатары қалың. Солардың бірі – жас әрі болашағы зор кенші, шпур бұрғылаушы Мұқажанов Дастан Бауыржанұлы. Ол компанияға 2010 жылы Сәтбаев қаласындағы «Қазақмыс» корпорациясының технологиялық колледжін «тау-кен ісі» мамандығы бойынша аяқтағаннан кейін бірден жұмысқа орналасты.
«Құсмұрын-Ақбастау» кенішінде жұмысын Дастан Мұқажанов 3 жыл бұрын бастаған. Оған дейін ол Нұрқазғанда еңбек еткен. «Бұрғылаушының жұмысы мол жауапкершілік жүктейді. Өз ісіңе деген сүйіспеншілік үйден және отбасынан жырақ кеткен уақытты тезірек өткізуге көмектеседі» дейді Дастан. Еңбеккерлердің табысты жұмыс жасауы вахтадағы жайлы тұрмысқа да тікелей байланысты. Сондықтан корпорация жасаған жақсы жағдайлардың да маңызы айрықша.
– Жалақымыз жақсы және уақытында аламыз,отбасының қажеттіліктері үшін жеткілікті. Мұнда жақсы еңбек жағдайлары қалыптасқан. Тамақтану мәселесі шешімін тапқан. Бөлмелерде адамға қажетті барлық жабдықтар бар. Ең бастысы – жұмыс жасап, қауіпсіздік техникасын сақтасаңыз болғаны. Жалпы алғанда бұл кеніштің әлеуеті зор, – дейді кенші.
Бұрғылаушы Дастан Мұқажановтің айтуынша, мықты және тату отбасын еске түсіретін үйлесімді еңбек ұжымы табысты болу жолында бірлікті ту етіп келеді.
«Қазақмыс» корпорациясы» ЖШС сайтынан.
