«Қазақмыс» корпорациясы» ЖШС қарасты Жезқазған аймағындағы өндірістік нысан еңбеккерлерінің арасында салауатты өмір салтын насихаттап, денсаулықты нығайтуға бағытталған шаралар «КәсіпҚорған» кәсіподағы Жезқазған филиалы мен «Jastar Bolashaq» Жастар одағы тарапынан үзбей өтіп келеді.
Қос ұйымның ұйытқы болуымен жыл сайын ұйымдастырылатын спартакиада аясында баскетболдан турнир жалауын көтерген болатын. Жиырмадан аса кәсіпорынның командасы бақ сынаған бәсекеде үздіктер топ жарды. Бір аптаға ұласқан ойынның қорытындысы бойынша І орынды «Батыс» кеніші командасы жеңіп алса, екінші орынды «Қазақмыс Смэлтинг» ЖШС Жезқазған мыс қорыту зауыты еншіледі. «Қазақмыс Мэйнтенанс Сервисиз» ЖШС тау-кен, шахта жабдықтары зауытына ІІІ орынның жүлдесі бұйырды.
Биылғы жылдың алғашқы спартакиадалық ойынының шеңберінде баскетболдан жеңімпаз атанған «Батыс» кенішінің командалары алдағы жарыстарда да биік тұғырдан көріну үшін қызу дайындық үстінде. Оларға тек сәттілік тілейміз!
Бағдат ҚАЗКЕНОВ.
