Сондай-ақ оқыңыз
Балқаш, Жезқазған өңірлерінің мыс алыбы саналатын мыс қорыту зауыттарын бір арнаға тоғыстырып отырған «Қазақмыс Смэлтинг» ЖШС Бас директорлығына тағайындалған сәттен бастап Жәнібек Байғабелов өндіріс ошақтарының үдерістерін заманауи технологияға икемдеуден бөлек, еңбеккерлердің әлеуметтік тұрғыдағы мәселелерін шешуде ашық диалог қалыптастырды.
Еңбек жағдайын жақсартумен қатар, жұмысшының әлеуметтік мәселесін шешу қағидаты «Қазақмыс» корпорациясының басты ұстанымы екендігін жақсы білетін Жәнібек Алтынбекұлы тағы бір дәстүрге бастамашы болды. Өткен аптада Бас директор Балқаш қаласында арнайы болып, ондағы зауыттың еңбеккерлерімен таңғы ас кезінде кездесу ұйымдастырды. Бір дастарқан басында маңызды да қызықты тақырыптар талқыланды. Жәнібек Алтынбекұлы металлургтермен бас қосуда «Қазақмыс Смэлтинг» ЖШС-нің алдағы жоспарларымен бөлісті.
– Біз әрбір қызметкермен байланыс орнатудың маңыздылығына мән береміз. Осы орайда «Еститін Смэлтинг» жобасы аясында өндіріс саласындағы және әлеуметтік бағыттағы жұмысшылардың мәселелерін шешуге ұмтыламыз. Бұл жоба сіздердің өзекті сұрақтарыңызды мезгілінде қарастырып, оң нәтижеге жетуге ықпал етеді. Компания мұндай кездесулер арқылы кез келген түйінді тарқатуға басымдық береді, – деді Жәнібек Алтынбекұлы.
