28 сәуір – Дүниежүзілік еңбекті қорғау күніне орай Жезқазған мыс қорыту зауытындағы «КәсіпҚорған» кәсіподағы комитеті «Сақтық – өміріңнің кепілі» атты байқау өткізеді. Бұл байқауға зауыттағы цехтар команда болып қатысады. Байқау 4 кезеңнен тұрады.
Өндірістік қауіпсіздікке бағытталған бұл шараның мән-маңызы турасында «КәсіпҚорған» кәсіподағы комитетінің төрағасы Ардақ Ақылбекова қысқаша баяндап берген болатын.
– Жезқазған мыс қорыту зауытындағы еңбекті қорғау талаптарын күшейтіп, жұмысшылардың осы бағыттағы біліктіліктерін арттыруға бағытталған байқау биыл алғаш рет қолға алынып отыр. Кәсіпорын басшылығымен бірлесе өтетін шара үш кезеңнен тұрады. Бірінші кезеңде қатысушы командалар өздерін таныстырады. Негізгі шарт – өлең шумақтарымен мамандығын және еңбек қауіпсіздігін ұштастыруы керек. Бейнеролик түрінде де болады.
Екінші кезең – «Тауып көр» айдары. Бұл кезеңде командаларға өздерінің кәсіптеріне және еңбек қауіпсіздігіне байланысты сұрақтар қойылады. Бір командаға кем дегенде 5 сұрақтан қойылады. Жұмыс орнында төтенше жағдай болғанда оны адам өміріне қауіп төндірмейтіндей етіп шешу жолдарын көрініспен көрсету үшінші кезеңді қамтитын болады.
Қауіпсіз еңбек адам өмірін сақтап қалады. Сондықтан өндіріс ошағында мұндай шараларды жиі ұйымдастыру мыс қорыту зауытының еңбеккерлеріне қажет деп ойлаймын.
28 сәуір – Дүниежүзілік еңбекті қорғау күніне арналған байқауда зауыттың цехтары белсенділік танытып, үздігі жеңімпаз болуға лайықты. Барлықтарыңызды байқауға белсене қатысуға шақырамыз, – деді Ардақ Мұқажанқызы.
Бағдат ҚАЗКЕНОВ.
