Мемлекет басшысы Қасым-Жомарт Тоқаевтың Жарлығымен биыл «Жұмысшы мамандықтар жылы» деп бекітілді. Ондағы мақсат қоғам дамуына өзіндік үлесін қосып жүрген жұмысшы мамандық иелерін ұлықтау болып табылады.
«Қазақмыс» корпорациясы өндірістің негізгі және қосалқы буындарында еңбек етіп жүрген жұмысшыларды ұлықтауды дәстүрге айналдырған.
Бұл игі шара «Жұмысшы мамандықтар жылы» аясында кең өріс алды. Корпорацияның демеушілігімен тау-кен, металлургия және аралас өндіріс еңбеккерлерінің «КәсіпҚорған» кәсіподағы «КәсіпSKILLS» шеберлік байқауын өткізуді қолға алды. Кенші мен байытушы күні қарсаңында аталған байқау кеншілер арасында өтуде. Жезқазған аймағындағы шахталарда еңбек ететін 8 мамандық иесі осы байқау арқылы өздерінің кәсіби біліктіліктерін сынға салуда.
Апта басында байқау комиссиясының мүшелері Шығыс Жезқазған кенішінде болды. Комиссия мүшелері байқауға қатысуға ниет білдірген тиеу, жеткізу машинистерінің, үңгушілердің кәсібилігіне көз жеткізді. Байқауда үздік көрсеткіш көрсеткендерді анықтайтын сәт те таяп қалды. Жеңімпаздар мереке қарсаңында марапатталады. Айта кетейік, байқау қоры 4 млн теңгені құрайды.
