Бұл қаражат ескі су тазарту нысандарын заманауи мембраналық жабдықпен жаңғыртуға бағытталады. Жобаның екінші кезеңінде қуаты тәулігіне 124 мың текше метрді құрайтын нысандар толықтай қайта жаңартылатын болады.
Жезқазған қалалық құрылыс бөлімінің басшысы Мәруа Келмағанбетованың айтуынша, бүгінгі күнде шаруашылық станциясында фильтрлар орнатылып жатыр. Әлі де бірнеше қондырғылар орнатылады. Технологиялық сорғы станциясы бар. Соның құрылысы жалғасады.
Жезқазған қаласының тұрғындарын ауызсумен қамтамасыз ететін басты көз –Кеңгір су қоймасы. Алайда, қаланың су тазарту құрылыстары 1966 жылдан бері жұмыс істеп келеді. Қазіргі таңда ондағы жабдықтар мен технологиялардың 90 пайызы тозған. Бұл мәселені шешу – қала тұрғындары үшін аса маңызды. Себебі, жаңа технологиялар енгізілген соң 93 мыңнан астам адамның таза ауызсуға қолжетімділігі артып, санитарлық-гигиеналық өмір сүру сапасы едәуір жақсарады.
