Өткен аптада Ұлытау облысының әкімі Дастан Рыспеков жұмыс сапарымен Жаңаарқа ауданында болып қайтты. Сапар барысында өңір басшысы ауданның тыныс-тіршілігімен танысып, маңызды мәселелерді талқылады.
Дастан Рыспеков алдымен «Жалын» кенішінің жұмысымен және байыту фабрикасының құрылысымен танысты. Облыс әкімі өз кезегінде аталған нысанның өңір дамытудағы үлесін атап, кәсіпорын басшылығына жұмысшылардың әлеуметтік жағдайын тұрақты бақылауда ұстауды және Жаңаарқа ауданы әкімдігі арасындағы меморандум аясындағы жүргізіліп жатқан іс-шаралардың тиімділігін арттыру қажеттілігін тапсырды.
Бұдан соң өңір басшысы «Едіге» шаруа қожалығының жұмысымен және жоспарларымен танысты. Өз кезегінде облыс әкімі әлеуметтік-кәсіпкерлік корпорациясымен тығыз жұмыс істеудің, сүт өнімдерін өндіруге күш салудың маңыздылығын атап өтті.
Жаңаарқа кентінде салынған жаңа блокты-модульді қазандықтың жұмысын бақылаған өңір басшысы заманауи жобаны облыстың өзге де аймақтарында жүзеге асыру қажеттілігін қарастыруды тапсырды.
Жаттығу залы бар жабық жүзу бассейнінде болған аймақ басшысы нысанның өз шығынын өзі ақтап, табысын арттыру, келушілер санын көбейту жолдарын қарастыруды, жаттығу залын жабдықтауды тапсырды.
Ал, кенттегі №1 мектеп-лицейінің жұмысын бақылаған облыс әкімі оқушыларды еңбекке баулу, көгалдандыруды дамыту мақсатында облыстың өзге мектептерімен тәжірибе алмасып жұмыс істеу ұсынысын білдіріп, балаларға оқу үрдісінде сәттілік тіледі.
Сонымен қатар, өңір басшысы жұмыс сапарының аясында «Атасу» бас мұнай айдау станциясының және Ақтайлақ ауылындағы «Uly Dala» ЖШС-нің консерві цехының жұмысымен танысты.
Ұлытау облысының әкімі өз кезегінде, өңір нарығында өз өнімдерімізді көбейту қажеттілігін атап, өнімдерді экспортқа шығару бойынша күш салу міндетін жүктеді. Орайы келгенде айта кетейік, «Uly Dala» ЖШС өткен жылдан бастап Катар еліне қой етін экспорттауды бастады.
Гүлім МАРАТҚЫЗЫ.
