Ағайынды Асатовтар аймақ жұртшылығына жақсы таныс. «Садық» десе көз алдыңа сағым ойнаған сары белде бой көтерген қуатты Жәйрем кен-байыту комбинаты келеді. Інісі де ірі. Ол – ҚР еңбегі сіңген энергетик, Сәтбаев қаласының Құрметті азаматы, «Қазақмыс» корпорациясының «Құрметті еңбек ардагері», ақын Яхия.
Ол өңір энергетикасының өркендеуіне өлшеусіз үлес қосты. Әсіресе, кеніштердің кемелденуіне елеулі еңбек сіңірді. Оған ғұмырының 62 жылын арнады. Сырқатқа шалдығып, төсек тартып жатып қалғанша электр жабдықтарына сервистік қызмет көрсету басқармасында қызмет істеді.
Шынболат шайыр «Қарасаң көз тояды тұлғасына» деп өлеңмен өрнектеген Яхия ағаның кісілігі емес, қашанда кішілігі көрініп тұратын. Адамның ең асыл қасиеті адал еңбек пен өрелі ой деп ұққан оның кеудесі сыр сандық еді. Дария көңіл, дархан жүректі ол елдік пен ерлікті, бірлік пен берекені, еңбек пен елжандылықты өмірлік темірқазық етіп ұстанды.
Оның артында қалған өміршең өлеңдерін өңдеп, басын қосып «Дариға-дәурен» атты жыр жинағын құрастырған Қазақстан Жазушылар одағының мүшесі, ақын Мұса Тілеуов аға аманатына адалдығын танытты. Асатов әлемін әйгілейтін жыр жауһарының жарыққа шығуына Сәтбаев қаласының әкімдігі демеушілік етті.
Өткен сенбіде Абай атындағы № 4 мектеп-лицейінің мәжіліс залында жинақтың тұсаукесері болды. Тұсаукесер рәсімін жиналған жұртшылықты жыр жинағының шығуымен құттықтаған қала әкімі Мұрат Бөрібаев, «Қазақтың Кетбұқасы» қоғамдық бірлестігінің төрағасы Төлеген Бүкіров және Сәтбаев қаласының Құрметті азаматы Мұса Тілеуов жасады.
Тұсаукесерде сыйлас-сырлас болған замандастары мен інілері естелік айтты, мектеп оқушылары ақынның өлеңдерін оқыды. «Нұр шашу» ансамблі биден шашу шашып, Ербол Әлғожин мен Қайрат Әбеуов асқақтатып ән шырқады.
«Керемет» мейрамханасында марқұм Яхия Асатовтың жылдық асы беріліп, рухына құран бағышталды.
Әлібек ӘБДІРАШ.
Суреттерді түсірген автор.
