«Қазақмыс Мэйнтенанс Сервисиз» ЖШС тау-кен, шахта жабдықтары зауыты мен «Жезқазғансервис» кәсіпорны еңбеккерлерінің арасында Едіге Жолдаяқовты еске алуға арналған футболдан шағын турнир өтті. Бұл шараға «Jastar Bolashaq» Жастар одағы ұйытқы болды.
Онға жуық команда қатысқан бәсекеде үздіктер анықталып, марапатталды. Турнирдің қорытындысы бойынша І орынды «Жыланды» жобасының № 1 сервистік телімі жеңіп алса, ІІ орынды «Жыланды» жобасы № 2 сервистік телімі еншіледі. ІІІ орын Шығыс Жезқазған жобасы Анненск сервистік теліміне бұйырды. Сондай-ақ, ойында үздік деп танылған бірқатар ойыншылар арнайы номинацияларға ие болды.
Атап айтқанда, тау-кен, шахта зауытының құрастыру цехының электр-газбен дәнекерлеушісі Нұрболат Қоңқыш пен «Шығыс СарыОба» жобасы № 2 сервистік телімнің жабдықтарға қызмет көрсету және жөндеу жөніндегі электрслесарі Бейбіт Асан «Үздік ойыншы» номинациясымен марапатталды. «Үздік қақпашы» аталымы Шығыс Жезқазған жобасы Анненск сервистік телімінің электр дәнекерлеушісі Ердос Әбдікәрімовке бұйырды. «Шығыс Сары-Оба» жобасы № 1 сервистік телімінің жабдықтарға қызмет көрсету және жөндеу жөніндегі электрслесарі Еламан Әмзе үздік шабуылшы атанды.
Барлық жеңімпаз командалар мен номинация иегерлері ұйымдастырушылар атынан бағалы сыйлықтарға ие болды.
Сондай-ақ оқыңыз
Тоқтала кеткен жөн болар, Едіге Сәбитұлы «Қазақмыс Мэйнтенанс Сервисиз» ЖШС кәсіпорындарының дамуы мен жаңа жүйеде жұмыс атқаруына үлес қосқан сала майталманы болатын. Әріптестері Едіге Жолдаяқовтың есімі мен еңбегін ұмытпай, еске алуда. Аталған турнир соның нақты дәлелі болмақ.
Бағдат ҚАЗКЕНОВ.
