Жақында Ақтөбе қаласында Қазақстанның Халық қаһармандары мен Қазақстанның Еңбек Ерлері бас қосты. Аймақ төріндегі жиынға Ақтөбе облысы әкімдігі мен «Тәуелсіз Қазақстанның батырлары» ҚБ ұйытқы болды.
Аталған бас қосуға аймағымыздан шыққан алғашқы Қазақстанның Еңбек Ері, кенші, кен өндірісінің озаты Тұрсынбек Мақышев қатысып қайтты.
– Кеңес Одағының батыры Әлия Молдағұлованы дүниеге әкелген қасиетті мекенде екі күн қатарынан ерлік пен ұлттық патриотизмді жастарға насихаттауда құнды шаралар өтті. Ақтөбе өлкесіне барған сапарым жайлы әсерімді айтып жеткізу әсте мүмкін емес. Облыс әкімі Асхат Шахаров бастаған өңірдің зиялы қауым өкілдері Қазақстанның Халық қаһарманы, «Тәуелсіз Қазақстанның батырлары» ҚБ төрағасы, армия генералы Бақытжан Ертаевты, халық қаһармандары мен Қазақстанның Еңбек Ерлерін құрметпен күтіп алды.
Өңірге сапардың алғашқы күнінде біз заманауи технологиялар кешенімен жабдықталған «InvaPark» инкюлзивті қызметтер индустриясы» ҚБ ғимаратында болдық. Одан кейін аймақ басшысы Асхат Берлешұлы арнайы қабылдап, құрметті қонақтармен жүздесті.
Сонымен қатар, Әлия Молдағұлова ескерткішіне гүл-шоқтарын қою рәсімі өтті. Одан кейін батырдың мемориалдық музейін араладық. Сол күні Халық қаһармандары мен Еңбек Ерлерінің ІV конференциясы өтті. Онда жас ұрпақты елін-жерін сүюге бағытталған шараларды республикалық деңгейде жетілдірудің бағыттары талқыланды,
Түстен кейін Талғат Бигелдинов атындағы Әуе қорғаныс күштерінің әскери институтында әскери қызметшілермен кездесу өтті. 17 мамырда әр өңірден бас қосқан меймандар Алға ауданының Бестамақ ауылындағы Есет батыр мемориалдық кешенінде болды.
Ақтөбе облысына сапарымыз барысында біз ұлттық рухты жас ұрпаққа насихаттауда ауқымды істер атқарылып жатқанына куә болып, ерекше әсермен қайттық, – деді Тұрсынбек Шамбылұлы.
