Арқа журналистикасының жампозы, облыстық «Жезқазған туы» газеті құ-
рылған кезден бастап аймақ журналистикасының, соның ішінде «Мысты өңір» газетінде өңір мен өндірістің жылнамасын қалыптастыруда өлшеусіз қолтаңбасын қалдырған әріптесіміз Балтабек Әбеуовтің өмірден өткеніне бір жыл толуына орай жинақталып, жарық көрген кітап осылай деп аталады.
Мақалалар мен естеліктер, арнаулар мен толғаулар топтастырылған жаңа жинақ Астана қаласындағы «Кәусар» баспасынан жарық көрді. Жинақтың жауапты редакторы – осы кітапқа арқау болған кейіпкердің шәкірті, ізбасары Қуат Құрмансейіт.
«Ақиқаттың айбалтасы» атты бұл кітап төрт бөлімнен құралған. Әр бөлімінде журналистің көзі тірісінде түрлі басылымдарда жарық көрген, оның мәртебесін асқақтатқан әрқилы жазбалар, Балтекең жайлы әріптестерінің естеліктері мен толғаулары, кейіпкердің өмірден өтуіне орай әртүрлі басылымдарда жарық көрген қазанамалар мен көңілайтулар, журналистің ата-тегі, әулеті және жеке өмірі жайлы жазбалары топтастырылған.
Кітаптың алғысөзін Балтабек Әбеуовтың жан жары Орал Қасенбекова жазыпты.
«Ақылман ата-бабаларымыз мынау жалған дүниені «Қамшының сабындай ғана келте ғұмыр» деп тап басып айтқанына тағы бір мәрте көзім жетіп отыр. Құдай қосқан қосағым, перзенттерімнің асқар таудай әкесі, немерелеріміздің ардақты атасы, тірлікте арқа сүйер тірек-таянышым болған Балтекеңмен бірге өткізген жарасымды да жақсы күндер демде зу етіп өте шыққан секілді…» деп тебірене бастаған Орал жұбайымен өткен бақытты да байсалды күндерін, қызықты сәттерге болы шырайлы кездерін еске ала отырып, «Дүниеден өткеніне бір жыл толуына байланысты жарыққа шығып отырған осы кітапты асқар тауымыздай болған абзал азаматқа қойған ескерткішіміз, шынайы құрметіміздің белгісі деп қабыл алыңыздар, ардақты ағайын!» деп түйіндепті.
Ізтай БЕЛГІБАЙҰЛЫ.
