Сейсенбі күні мемлекеттік комиссияның екінші отырысында ҚР Премьер-министрінің орынбасары Қанат Бозымбаев «Жомарт» кенішінде болған апаттың себебін анықтауға 10 күн уақыт берді. Айта кету керек, мемлекеттік комиссия Мемлекет басшысының тікелей тапсырмасымен құрылған.Қазір алдын ала болжам айту қиын, себебі бүгін кеніштің астына түсу мүмкін болмаған.
Алдымен, Премьер-министрдің орынбасары Қанат Бозымбаев ведомство өкілдерінің есебін тыңдап шықты. Онда, алдын ала болжам айтылмады. Тек, тиісті сараптамадан кейін ғана белгілі болатындығы айтылды. «Қазақмыс» корпорациясының басқарма төрағасы Нұрахмет Нұриев шахтада болған апат компанияның кінәсі екенін жасырмады. Сондай-ақ, жердің астындағы ауадан сынама алу үшін мамандарды түсіру қауіпті екенін жеткізді. Стратегиялық нысан қатаң бақылауда.
– Біздің тараптан да арнайы штаб құрылып, жұмысын бастады. Шыққан нәтижелерін арнайы органдарға жеткізіп отырамыз. Ең алдымен бұл қайғылы оқиға компанияның кінәсі екенін мойындаймыз. Техникалық қауіпсіздікке қаншама күш жұмсасақ та, осындай оқиға орын алып отыр. Отбасыларына көмек беріп жатырмыз, – деді «Қазақмыс корпорациясы» ЖШС басқарма төрағасы Нұрахмет Нұриев.
Вице-премьер Қанат Бозымбаев: «Апат себебі анықталғаннан кейін кенішті осы режимде жұмыс істеуге болатындығы немесе болмайтындығы туралы шешім қабылданады», – деді. – Себебі анықталғаннан кейін шара қабылдауымыз қажет. Газоанализатор бар екендігін айғақтайтын дабыл белгісін орнату немесе газды жою бойынша келісімшарттағы міндеттемелерге өзгеріс енгізу қажет деп ойлаймын. Ең бастысы жұмысшының қауіпсіздігі сақталуы қажет.
Үкіметтік комиссия төрағасы Қанат Бозымбаев қаза тапқан кеншілердің мәйітін туған жерлеріне жеткізуге және дәсүрге сай жерлеуге қолдау көрсетіп, жақындарына көмек беруді «Қазақмыс» компаниясы мен облыс әкімдігіне жүктеді. Жалпы, «Жомарт» кеніші Жезқазғаннан 200 шақырым жерде орналасқан. Онда 2 мыңға жуық адам жұмыс істейді. Кеніште жұмыстың жалғасуы сараптама нәтижесінен кейін ғана белгілі болады.
Гүлім МАРАТҚЫЗЫ.
