Ұлытау облысында алғашқы рет көп балалы аналар арасында «Алқалы ару-2025» байқауы өткізілді. Наурыз мейрамы аясында өткен байқауға облыстың әр өңірінен Алтын алқа және Күміс алқа иегерлері атанған 8 ана қатысты. «BIRGE.KZ.ULYTAU» қоғамдық бірлестігі ұйымдастырған бұл айрықша шараны тамашалауға Жезқазғандағы Халықтар достығы мен мәдениеті үйіне жұртшылық көптеп жиналды.
Сахнаға бірнеше кезең бойынша кезек-кезегімен шыққан аналар отбасы мүшелерімен бірге өз өнерлерін ортаға салды. Олар алғашқы кезеңде өздерін таныстырса, екінші кезеңде қабілет-қарымдарын танытатын әртүрлі сауалдарға жауап берді. Ал, үшінші кезеңде әйелдердің ежелгі ұлттық киімдерінің үлгісі мен ерекшелігін қысқа уақыттың ішінде талдап айтып берсе, төртінші кезеңде бойдағы өнерлерімен көрінді. Қазылар алқасы қатысушылардың өнерін төрт кезең бойынша жеке-жеке бағалап, ұпайларын беріп отырды.
Сынақ қорытындысы бойынша аналардың барлығына лайықты жүлделер тағайындалды. «Алқалы ару-2025» байқауының бас жүлдесін жезқазғандық кәсіпкер, Күміс алқалы көп балалы ана Самал Садықова жеңіп алып, 500 мың теңге сыйлыққа ие болды. Сондай-ақ 300 мың теңге жүлдесі бар бірінші орын Жезді кентінен келген Күміс алқалы Гүлжазира Зейілғазинаға, екінші орын 250 мың теңге жүлдесімен сәтбаевтық Алтын алқалы ана Айгүл Әбішеваға, 150 мың теңге сыйлығы бар үшінші орын Жәйрем кентінен қатысқан Алтын алқалы Ақтоты Әділбековаға бұйырды. Қалған қатысушылардың өнері халық арасында тарихи тұлғаға айналған аңыз аналар атындағы номинациялармен бағаланды. Атап айтқанда, қазылар шешімі бойынша «Жұбан ана» атындағы және «Даңқты ана» номинацияларына Сәтбаев қаласының көп балалы аналары Айжан Шәріпова мен Әйгерім Тоқтасынова, «Әлпеш ана» номинациясына жезқазғандық Ақжарқын Токишева, «Бидаш ана» номинациясына қарсақбайлық Сандуғаш Дүтбаева лайық деп табылып, олардың әрқайсына 100 мың теңгенің сертификаты тапсырылды. Сонымен қатар Қарсақбайдан қатысқан Алтын алқалы ана С. Дүтбаеваға «Кеңгір» шипажайына 10 күндік жолдама қоса берілді. Байқау жүлдесіне ие болған аналардың барлығы арнайы дипломмен марапатталды.
Бұл маңызды іс-шараның облыстық және Жезқазған, Сәтбаев қалалары әкімдіктерінің қолдауымен, аймақтағы Атымтай жомарт азаматтардың демеушілігімен өткенін атап өткен жөн. Сондай-ақ байқауға қатысқан барлық көп балалы аналарға «Халық банк» АҚ Ұлытау облыстық филиалы тұрмыстық техника дүкенінен 20 мың теңгенің затын алатын сертификаттар табыстаса, «Атамекен» кәсіпкерлік палатасының Ұлытау облыстық филиалы номинация иелеріне кәсіпкерлік қырын үйрететін арнайы курстың жолдамаларын сыйға тартты.
Амандық РАХҰЛЫ.
