Спорттың ерекше әрі елімізде енді ғана қарқын ала бастаған түрі таяқ тартудан Ұлытау облысы бойынша дүбірлі додаларда бақ сынап жүрген жерлесіміз, Оңтүстік Жезқазған кеніші № 45 шахтаның № 3 телімінде бұрғылаушының көмекшісі болып еңбек ететін Инаят Транов жақында Қырғызстан мемлекетінің астанасы Бішкектен жүлдемен оралды.
Таяқ тартудан өткен VI әлем Чемпионатында Инаят Транов елімізге күміс олжалап қайтты. Бұл әлем чемпионатында жиырмадан аса елден спортшы қатысқан. Қазақстан бойынша 24 үміткер бақ сынады.
– Айыр қалпақты ағайындылардың елінде өткен додада әлем бойынша қазақстандық 6 спортшы қолаға қол жеткізсе, екі спортшы күміс олжаладық. Менің қарсыластарым өте мықты болды. Ең бірінші Конгодан келген спортшымен бақ сынап, оны екі де бір есебімен ұттым. Екінші айналымда Моңғолияның спортшысына қарсы тұрдым. Оны екі де ноль есебімен артта қалдырдым.
Ақтық мәреде Якутиядан келген чемпионмен шықтым. Бұл бәсекеде мен есе жіберіп қойдым. Ол ноль де екі ұпаймен жеңіп кетті. Әлем Чемпионатындағы күміс жүлдем алдағы үлкен жеңістерімнің бастауы деп білемін, – деді Инаят.
Сондай-ақ оқыңыз
Айта кетейік, Инаят Трановтың бұл спорт түрімен айналысқанына бір жылдан аса уақыт өтіпті. Ол сәуір айында Астана қаласында өткен бірінші республикалық турнирде І орын иеленген болатын. Асқар Әбдіхамиттен спорттың қыр-сырын меңгерген оның әлемдік дәрежедегі додалардан алтын алуға үміті мол.
Бағдат ҚАЗКЕНОВ.
