Таяуда әлеужеліде мынандай шағын ақпарат көзіме түсті: «Биыл ұлы қазақ ойшылы әрі ақыны Абай Құнанбайұлының туғанына 180 жыл толады. Осыған орай, «ASSYLTAS» қоғамдық қоры осы жылды «Абай жылы» деп жариялап, ұлы философтың мұрасын сақтау мақсатында ерекше бастама көтерді.
2025 жылғы 10 тамызда дүниеге келген Абай есімді балаларға 180 000 теңге көлемінде сыйақы тағайындалады.
Қапы қалмаңыздар!».
Артынша танымал журналист Нұрсейіт Жылқышыбайдың жазбасы жарияланды: «Кәсіпкер Дулат Тастекей ағамыз Ұлы Абайдың 180 жылдығына керемет бір бастама көтеріп жатыр екен. 2025 жылдың 10 тамызында дүние есігін ашқан барлық «Абайларға» 180 мың теңгеден көрімдік бермек екен. «Асылтас» қорының бұл бастамасын мен де өз шама-шарқымша қолдаймын. Бірақ…
Сондай-ақ оқыңыз
Қазақта Абай деген аз емес. Ал, Құнанбай ше? Алда бір жазғанымдай, Құнанбай, Дөнентай, Тұрсын сынды қазір қазақы аттар қойылмай кетті. Есесіне арабша аттар қаптады. Бұл бір. Екіншіден, Абайдың Абай болуына ықпал еткен әкесі. Емендей берік, бәйтеректей зор Құнанбай! Қарадан шығып хан болған. Әділдікті қақ жарған шешен, әрі палуан болған тұлға!
Менің шартым: ұлының атын Құнанбай деп қойған 10 адамға «Аламан» компаниясының атынан 3 млн. теңге бөлемін. Яғни, балаңыздың атын Құнанбай деп қойсаңыз, 300 мың теңгені бірден шотыңызға аударып жіберемін. Ол үшін мына нөмірдің 8 707 179 79 42 ватсабына туу туралы куәлікті жіберсеңіз болғаны. Бұл шара 1 наурыздан басталады.
Әрине, кейін өздеріңізге бұл шараның есебін беремін. Он сәби «Құнанбайды» таныстырамын».
Әріптесімнің: «Қазақта Абай деген аз емес» дегені қызығушылығымды қоздырып, әлеужеліні ақтаруға түрткі болды. Тағы бір әріптесім, қазір ҚР Президентінің аппаратында қызмет істейтін Бауыржан Омардың былтырғы жазбасын жолықтырдым. Жоғарыдағы жағымды жаңалыққа қосып соны оқырмандар назарына ұсынамын:
«Елімізде он сегіз мың екі жүз жетпіс үш Абай бар екен. Ал, ұлы ақынның шын есімі – Ибраһим ныспысын иеленгендер жиырма жеті мың үш жүз отыз жеті көрінеді. Ұлттық статистика бюросының мәліметіне сүйенген Ulysmedia.kz. сайты отыз сегіз елдімекен ақын есімімен аталғанын, оның үшеуі аудан, біреуі қала, оны ауылдық округ, жиырма төрті ауыл екенін атап көрсетті.
«Қазақпарат» агенттігінің сәл ілгеріректегі зерттеулерінде соңғы оншақты жылда екі жарым мыңдай Абай өмірге келгені, сол Абайдың көбі Түркістан төңірегін мекендейтіні, ұлы ақынның туып-өскен өлкесінде төрт жүзге жуық Абай бар екені айтылған еді. Ал, еліміздегі көзі тірі ең үлкен Абайдың жасы тоқсаннан асып кетіпті. Статистика мекемесі ұсынған мәліметке жүгінсек, Абай Құнанбаев және Абай Құнанбайұлы деген есімді толық иеленген азаматтардың өзі алпысқа жуық. Оның көбісі Түркістан облысында тұрады.
Мұхтар Шаханов ағамыз баяғыда жар іздеген жастар туралы толғауында: «Егер бүгін қайта туса ұлы Абай, Ол да саған қалар еді ұнамай…» деп жазып еді. Сол Мұхаң айтқандай, он сегіз мың ғаламның бір мүйісінде он сегіз мың Абай жүр. Түрлі-түрлі Абай. Сабырлы Абай, сырбаз Абай, сөзшең Абай… Өр Абай, өктем Абай, өнегелі Абай… Мінезді Абай, маңғаз Абай, момын Абай… Қайратты Абай, қайсар Абай, қыңыр Абай… Біреуі – елеулі, біреулі – елеусіз. Біреуі – қалаулы, біреуі – жалаулы. Біреуі – ақын, біреуі – соған жақын…
Бірақ, бәрінің де ортақ міндеті бар. Баяғыда ата-анасы азан шақырып қойған Абай деген ардақты атқа ешқайсысы да кір келтірмеуі керек. Соған сенейік!».
Әлібек ӘБДІРАШ.
