Облыс әкімі Дастан Рыспеков жұмыс сапарымен Ұлытау ауданына барып, аудан орталығындағы бірқатар нысандарды аралады.
Аймақ басшысы алдымен аудан орталығында орнатылған кәріз тазарту қондырғысына атбасын тіреді. Аудандық құрылыс бөлімінің тапсырысы бойынша қолға алынған жоба 2022 жылы толығымен аяқталса да, сол жылдың күзінде кәріз тазалағыш ғимараттың екі сорғысы істен шығып, құрылыс нысаны қабылданбай қалған.
Аудан әкімі Аманжол Мырзабеков аталған нысан жыл соңына дейін аяқталатынын айтты. Әрі қарай аймақ басшысы бастаған топ Өлкетану мұражайына барды. Мұнда ғимарат ауласына ауданның 85 жылдығына демеушілер есебінен қойылған «Домбыра» мүсіні таныстырылды. Биылғы жылы мұражайға орташа жөндеу жұмыстары жүргізілген.
Ұлытау селосының Абай көшесінде салынып жатқан 36 пәтерлі үш қабатты тұрғын үй де аймақ басшысының назарын аударды. «Самға» мердігерлік компаниясының өкілдері құрылыс жұмыстарының дені аяқталуға жақын екендігін жеткізді. Желтоқсанның соңына дейін толықтай дайын болатын тұрғын үй 2025 жылдан бастап пайдалануға берілмек.
Сондай-ақ оқыңыз
Облыс әкімі бұдан өзге аудан орталығындағы Спорт кешенінде де болды. Ғимаратқа ағымдағы жөндеу жұмыстары жүргізілген. Бүгінгі таңда спорт кешенінде спорттың 8 түрі бойынша үйірмелер тұрақты жұмыс істеуде. Айта кетейік, ауданда жуырда бассейн кешені жобасы қолға алынбақ.
Сонымен қатар, Дастан Рыспеков құрылысы жүріп жатқан аурухана мен емханадағы жұмыстарды да бақылады. Ауруханада ішкі әрлеу, инженерлік істер және абаттандыру жұмыстары жүргізілуде.
Облыс әкімінің Ұлытау ауданына жасаған жұмыс сапары – ауданға қарасты Жезді және Қарсақбай кенттерінде жалғасын тапты.
Гүлім МАРАТҚЫЗЫ.
