«Жігер» спорт кешенінде самбо күресінен ҚР-ның спорт шебері Батырлан Сариновты еске алуға арналған дзюдодан дәстүрге айналған республикалық турнир болды.
Жарысқа 23 жасқа дейінгі ұлдар мен қыздар өзара бақ сынасты. Республикалық турнирге Жезқазған қаласы әкімінің орынбасары Берік Әбен бастаған жергілікті билік өкілдері арнайы қатысып, құттықтау сөз сөйледі. Жарыс ұйымдастырушылары мұндай турнирлер арқылы жастардың спортқа деген қызығушылығын арттырамыз дейді. Аталған жарысқа еліміздің түкпір-түкпірінен 300-ден аса дзюдошы келді. Жыл санап, жарысқа қатысушылардың саны артып келеді. Дзюдошылар жоғары әзірлікпен, жүлде үшін бекініп келгендіктерін бірден байқатты.
Қарағанды облысынан келген қатысушы Манас Мырзахметов спортта 10 жасынан бастап жүргенін айтып, Қазақстанның көк туын әлемге паш етуді мақсат еткенін жеткізді. Сонымен дүбірлі бәсекеде әр салмақ дәрежесінде белдескен жас спортшылар өзара кіл мықтыны анықтады.
