Мамыр айының соңғы жексенбісінде химия саласының қызметкерлері өздерінің төл мерекелерін атап өтеді. Аймағымыздағы құю-механикалық зауытындағы зертхана мамандары өздерінің кәсіби мерекелеріне толайым табыспен жетіп отыр.
Зауытта қара металдан құйылатын өнімдердің сапасына сараптама жасайтын зертхананың зерделі зертханашылары талапқа сай міндеттерін жүзеге асырып отыр.
Әсел Жүнісова басшылық жасайтын зертханада бүгінде 10 зертханашы жұмыс істеуде. Салаға еңбегі сіңген Роза Өмірзақова, Зинаида Пабло сынды майталман мамандары бар ұжымда алдыңғы буынның ізін басқан бәтимаш Ибраева, Гүлбану Күштібаева, Лаура Қуандықова, Тоғжан Какенова, Бақытжамал Кідікенова, Жансая Тасыбаева, Нина Зубова, Анжелла Севостьянова сынды мамандар топтасқан.
Ұжымның тізгінін ұстаған Әсел Жүсіпова бұл ұжымда 2011 жылдан бері еңбек етуде. Қымбат Үселованың мектебінен өткен Әсел бүгінде ұжымды ұйымшылдықпен басқарып отыр.
– Зауытта өндірілетін өнімнің сапасына алдын ала талдау және зерттеу жұмыстары осы зертханада жүзеге асады. Ұжым білікті кадрлармен қамтылған. Зерттеп, талдаудың нәтижесінде біз сапалы өнімге қол жеткіземіз. Зауыттың әр металдан өндірген өнімінің сапалы болуына тікелей зертхана ұжымы атсалысып келеді. Роза Өмірзақова, Зинаида Пабло сынды озаттарымыз барда біздің зертханашылар әрқашан сапалы өнімнің көрсеткішін төмендетпейді. «Қазақмыс» корпорациясы» ЖШС құрылымындағы зертханашы әріптестерімізді төл мерекемен құттықтап, еңбектеріне табыс тілеймін, – деді зертхана басшысы Әсел Жүсіпова.
Сондай-ақ оқыңыз
Құю-механикалық зауытының аймақтағы өндірістік нысандарына сапалы бұйым жасаудағы еңбегінде зертханашылардың еңбегі жатқаны сөзсіз.
