Сондай-ақ оқыңыз
Жезқазған қаласының әкімдігінің ұйымдастыруымен Жеңістің 80 жылдығына орай «Ұлы Жеңіс: ерлікке – тағзым, ұрпаққа – үлгі» атты әскери-спорттық ойын өтті.
Әскери-спорттық ойынға қаламыздағы алғашқы әскери дайындық пәнінің мұғалімдері, Ұлттық ұланның 6505 әскери бөлімі, Тәжік-Ауған әскери қақтығысына қатысқан азаматтар және Ауған соғысының ардагерлері, сондай-ақ Ұлытау облыстық қорғаныс істері жөніндегі департаментінің қызметкерлері қатысты. Мақсаты – жас ұрпаққа патриоттық тәрбие беру, ерлікті үлгі ету. Ұлытау облыстық «Чернобыль жаңғырығы» ҚБ төрағасы Мұхит Үңгітбаев: – Бізден елін, жерін қорғайтын азаматтар шығу керек, сол үшін де алғашқы әскери дайындық мұғалімдерін шақырдық. Жастарға үлгі болсын деген дүние ғой, – деді өз сөзінде.
Қатысушылар 5 топқа бөлініп, пневматикалық қарудан нысанды көздеп оқ атты, автоматты уақытқа шашып жинады. «Ардагелер, жас кезімізде қолымызға қару ұстап, қақтығыстарға қатыстық. Уақыт өтсе де, әскери дайындық дағдылары ұмытылмапты» – деді Ұлытау облыстық «Тәжік-Ауған қақтығысы» ҚБ төрағасы Қайсар Бимұратов ойын жайлы өз ойын былай бөлісті: – Пневматикалық мылтықтан атуға 6 оқ берілді, оның бесеуін тигізу керек. Сол есепке саналады. Ауған соғысының ардагерлері жақсы нәтиже көрсетіп жатыр, өзімді санасам 57 балл болыпты. Автоматты шашып-жинау бойынша барымызды салып жатырмыз. Норматив 19 секунд. Жалпы жаман емес, ұмытпаппыз, – деді.
Сайыс соңында үздік нәтиже көрсеткен қатысушылар арнайы марапаттарға ие болды. Айта кету керек, Жеңістің 80 жылдығына орай қаламызда басқа да іс-шаралар жоспарланған.
