Жезқазғандағы жол мәселесі қашаннан да өзекті. Әсіресе көктем келе жезқазғандық жүргізушілердің де, жаяу жүргіншілердің де бейнеті артады. Былтыр Жезқазғанда 57 көшенің жолы жаңарады деген жаңалық таратқанбыз. Қалалық және облыстық қаражат есебінен автокөлік жолдарын жөндеуге Жезқазған қаласы бойынша 3,5 млрд теңге де бөлінген болатын.
Сонымен, 57 көшенің орташа жөндеу жұмыстары толық аяқталмаған. Яғни, 2 көше инженерлік- коммуникациялық желілерді тарту жұмыстарына байланысты жоспардан алынып тасталған. Ал, 4 көше 2025 жылға өтпелі нысан ретінде белгіленген. Қалған 51 көшенің жайы қандай?
Бұл сұраққа Жезқазған қалалық жолаушылар көлігі және автокөлік жолдары бөлімінің басшысы Нұрбол Садықов былай деп жауап берді:
–51 көшеде жұмыстар жасалды. Алайда, келісімшарт бойынша толық аяқталғаны бір ғана көше. Қалғандары бойынша келісімшарттар бұзылды. Бұзылған келісімшарттар бойынша сот органдарына талап арыздар жолдаған болатынбыз.
Сондай-ақ оқыңыз
Жаңа төселген жолдар жыл толмай жатып ойылып қалған. Сәт сайын доңғалақты дүрсілдетіп соғатын ойық-ойық жол жүргізушілерді әбден қажытқан. Мұны жергілікті әкімдік білмейді емес, біледі. Сондықтан жұмыстың сапасыз орындалуына байланысты мердігерлерге қаржы төленбеген. Әкімдік сотқа арыз түсіріп, алғашқы отырысы да өткен. Енді, апплециялық шағым берілмек. Сонымен қатар,«Жол активтері ұлттық сапа орталығының» облыстық филиалы жүргізген зертханалық тексеру нәтижелері төселген жолдардың талапқа сай еместігін көрсеткен.
– 300-ге жуық жол-құрылыс материалдарынан сынама алынып, оның 70-ке таманы нормативтік құжаттарға сәйкес келмеді, дейді «Жол активтері ұлттық сапа орталығының» облыстық филиалының зертхана меңгерушісі Жолдасбек Серік.
Айта кету керек, биыл, Жезқазған қаласының 14 көшесіне орташа жөндеу жұмыстары жүргізеледі. Бюджет есебінен оған 4 млрд 55 млн теңге бөлінеді деп жоспарланған.
Гүлім МАРАТҚЫЗЫ.
