«КәсіпҚорған» кәсіподағының Жезқазған филиалы 8 Наурыз – Халықаралық әйелдер күніне орай «Қазақмыс» корпорациясы» ЖШС негізгі құрылымдары мен қосалқы кәсіпорындарында еңбек ететін аруларға мерекелік көңіл-күй мен марапат тарту етті.
Филиалға қарасты Оңтүстік Жезқазған, Шығыс Жезқазған және «Батыс» кеніштеріндегі комитеттер өндірістегі озат қыз-келіншектерді Сәтбаев қаласындағы «Бақдәулет» мейрамханасында қарсы алып, құрмет-қошемет көрсетті. Жиналған нәзік жандарға филиал төрағасы Ақылбек Төлепбергенов құттықтауын арнап, үш кеніштің аруларын марапаттады. Мерекеде бір топ қыз-келіншектер «Еңбек озаты», «Кәсіподақтың Құрметті қайраткері» төсбелгілеріне ие болды.
Аруларға деген ілтипат «Жыланды», «Жомарт», «Қазақмыс Мэйнтенанс Сервисиз» ЖШС, «Сәтбаев қалалық жылумен, сумен жабдықтау кәсіпорны» ЖШС, Жылу-энергетика кәсіпорны, энергетика басқармасы, «Транко Экспресс» ЖШС, бірыңғай қойма шаруашылығы сынды мекемелерде де көрініс тапты. Жезқазған байыту фабрикасы, «Жезқазған жылумен, сумен жабдықтау кәсіпорны» ЖШС, «Транко Жез» ЖШС, Жезқазған мыс қорыту зауыты, құю-механикалық зауыты, мамандандырылған жөндеу-механикалық басқармасы, «Жезқазған медициналық орталығы» ЖШС, «Жезқазғантүстімет» ӨБ, сапаны бақылау дирекциясы, Қарсақбай металлургиялық зауыты өндірістегі аруларын ұлықтады.
Сонымен қатар, «КәсіпҚорған» кәсіподағы Жезқазған филиалының төрағасы Ақылбек Төлепбергенов «Қазақмыс» корпорациясы» ЖШС жанындағы Ардагерлер кеңесі мен «Jastar Bolashaq» Жастар одағында болып, ардақты әжелер мен аналарды, қыз-келіншектерді мерекемен құттықтады.
Сондай-ақ оқыңыз
Бағдат ҚАЗКЕНОВ.
