Құсмұрын-Ақбастау кенішіндегі өндірістік бөлімінің диспетчері, «КәсіпҚорған» кәсіподағы мен «Jastar Bolashaq» Жастар одағының белсендісі Меруерт Әбдікерованы әріптестері білікті маман әрі іскер ұйымдастырушы ретінде бағалайды.
Меруерт Қазыбекқызы еңбек жолын 1993 жылы Жезқазған қалалық телекоммуникация кәсіпорнында бастаған. Еңбекке араласқан алғашқы жылдардан бастап ол өзін жауапты, мақсатты және бастамашыл маман ретінде көрсете білді.
Жұмысын тау-кен саласында жалғастыра отырып, Құсмұрын-Ақбастау кенішінің өндірістік бөлімінің диспетчері болды. Вахталық әдіспен жұмыс істегенде ол уақытының көп бөлігін өзі үшін екінші үйге айналған кеніште өткізеді. Бұл жерде ол маңызды өндірістік үдерістерді бақылап қана қоймай, ұжымдағы бірлік пен ынтымақтастықты берік қалыптастырды.
Ұжымдық мәдениетті дамыту мен жас мамандарды қолдауда да айрықша үлес қосып келеді. Негізгі жұмысынан бөлек, Меруерт Қазыбекқызы қоғамдық жұмыстардың бел ортасынан табылады. Ол еңбеккерлердің құқықтарын қорғай отырып, кәсіподақ қозғалысында негізгі рөл атқарады, сондай-ақ «Jastar Bolashaq» ұйымы шеңберінде жастар бастамаларын ілгерілетумен айналысады. Оның қызметі жас мамандар арасындағы достық байланыстарды нығайтуға, оларды еңбекте ынталандыруға және салауатты өмір салтын қалыптастыруға ықпал етуде.
Меруерттің күш-жігерінің арқасында жас мамандар кәсіби өсу, тәлімгерлік және ұжымның әлеуметтік өміріне белсенді қатысу мүмкіндігіне ие болады. Меруерт Әбдікерова өз кәсібіне ерекше ықыласпен қарап, бүгінде абырой биігінен көрінуде.
Арман БЕЙСЕКЕЕВ.
