СТ-1 маркалы техникалық селен Балқаш қаласындағы «Қазақмыс Прогресс» ЖШС селен тазарту және шлак өңдеу цехында өндірілді. Бұл – Қазақстанда алғаш рет бірегей вакуумдық дистилляция әдісі қолданылған өнеркәсіптік өндіріс.
Жаңа технология селеннің әлемдік нарықтағы бағасының қосылған құнын 30 %-дан 97 %-ға дейін арттырды. Алғашқы жөнелтілім 100 тоннаны құрады, ал өнімдегі селеннің мөлшері шамамен 99,5 % болды.
Вакуумдық дистилляция әдісі селенді реагент қолданбай жоғары дәрежеде тазартуға мүмкіндік береді, сәйкесінше процесті экологиялық қауіпсіз етеді. Технологияны Satbayev University Металлургия және байыту институтының ғалымдары әзірледі. Осылайша бірегей қондырғы қолданысқа енгізіліп, түсті металдардың әлемдік нарығының талабына сай өнім өндіруге жол ашылды.
Жобаның тарихы 2017 – 2018 жылдары «Қазақмыс Прогресс» ЖШС Балқаш мыс балқыту зауытының (БМЗ) бағалы металдар цехындағы тазарту учаскесінің газ тазарту жүйесін жаңғыртудан басталды. Бұл тазартылмаған селен өндірісін жылына 60 тоннадан 100 тоннаға дейін арттыруға мүмкіндік беріп, оны тазартуды экономикалық тұрғыдан тиімді етті.
Сондай-ақ оқыңыз
Бағалы металдар өндірісінің қосалқы өнімі болып табылатын тазартылмаған селенді тазарту жобасын іске асыру 2020 жылы Балқаш өндірістік алаңында басталды. 2022 жылы жаңа өндірістік учаске іске қосылды, ал 2023 жылы өнеркәсіпте пайдаланыла басталды.
Қазіргі уақытта селен күн батареяларында, көшіру аппараттарында, шыны, керамика өндіруде, сондай-ақ медицина мен химия өнеркәсібінде қолданылады. Балқаштағы жаңа өндірістің іске қосылуы Қазақстан мен «Қазақмыс» компаниясының түсті металдардың әлемдік нарығындағы экономикалық позицияларын нығайтуға жаңа мүмкіндік береді.
«Қазақмыс» корпорациясы» ЖШС PR департаменті.
