Өңірдегі өндіріс ошақтарының қауіпсіздігін қадағалап, сақтық сақшылары атанған «Қорғау қызметі» ЖШС Жезқазған филиалында ерлермен қатар әйелдер қауымы нысандардың қорғалуына атсалысып келеді.
29 қазан күні елімізде аталып өтетін Күзет органдары қызметкерлерінің мерекесі қарсаңында сол арулар арасында «КәсіпҚорған» кәсіподағы комитеті мен филиал басшылығы қол күрестен жарыс ұйымдастырды. «Күш атасын танымас» демекші, күзетші нәзік жандар арасындағы жарысқа 14 адам өтініш берген.
Он төрттің ішінен үздігін анықтаған бәсекеде І орынды Гүлизат Әлиева жеңіп алды. ІІ орынды Ботакөз Қазыбаева еншілесе, ІІІ орын Ләззат Жекебатыроваға бұйырды. Жеңімпаздарға «КәсіпҚорған» кәсіподағы және «Amanat» партиясы «Қазақмыс» корпорациясы» ЖШС жанындағы Ұлытау облыстық филиалы атынан ақшалай жүлделер табысталды.
Бағдат ҚАЗКЕНОВ.
