«Қазақмыс Мэйнтенанс Сервисиз» ЖШС құрамындағы кәсіпорындарды заманауи талаптағы жабдықтармен қамту, жаңғырту сынды жұмыстар бүгінгі күні қарқынды жүзеге асуда.
Аталған компанияның бас директорлығына тағайындалған Саят Бәкіров елу жылдық тарихы бар тау-кен, шахта жабдықтары зауытындағы цехтарды модернизациялауға баса көңіл бөлуде. Мұндағы агрегаттық цехта өздігінен жүретін бұрғылау қондырғысының перфораторын жөндеу телімінің жұмысы жолға қойылды. Осыған дейін бұл шаруаларды бұрғылау қондырғысының жабдықтарымен қамтамасыз етуші «Epiroc», «Sandvik» компаниялары атқарып келген болатын. Енді шахта астындағы ауыр техниканың маңызды бөлігін аталмыш телімнің білікті мамандары жүргізеді.
Тораптарды жөндеу қызметі бөлімінің басшысы Нұртілек Қабдуалиевті әңгімеге тартқанымызда бұл телімнің маңыздылығын бізге былайша түсіндіріп берді.
– «Қазақмыс Мэйнтенанс Сервисиз» ЖШС кәсіпорындарын модернизациялау талабына сай қатарға қосылған телімнің мүмкіндігі мол. Арнайы жасақталған телімде ағымдық және күрделі жөндеуді қажет ететін перфораторларға қызмет көрсетіледі.
Ашылғаннан бері мұнда 7 перфоратор ағымдық, екеуі күрделі жөндеуден өтті. Бұл телімді жолға қоюдағы басшылықтың басты мақсаты шығындарды азайтып, сынған жабдықты жедел іске қосу болып отыр. Өзіміздің кәсіпорында осындай жабдықтарды уақытылы жөндеп, іске қосу өндірістің де қуатын арттыра түсетіні даусыз. Перфораторларды жөндеу жоғары санатты, білікті мамандарға жүктелуде.
Қазір бұл жұмыстармен Қайрат Әлішев деген азамат айналысуда. Жұмысқа қажетті заманауи құрал-жабдықтармен қамтылған. Перфораторларды ашып, жинау бұрышы да бар. Болашақта бұл телім қызметінің ауқымын кеңейту жоспарда, – деді ол.
Бағдат ҚАЗКЕНОВ.
